Jón Gerald mætti í yfirheyrslu

Jón Gerald Sullenberger mætti til yfirheyrslu hjá Ríkislögreglustjóra klukkan níu í gærmorgun í tengslum við rannsókn á hugsanlegum fjárdrætti núverandi og fyrrverandi forstjóra Baugs og öðrum mögulegum brotum þeirra gegn fyrirtækinu. Rannsókn lögreglu hefur staðið í tæp þrjú ár, frá ágústlokum 2002. Fjölmiðlar hittu Jón Gerald fyrir þegar hann mætti til yfirheyrslu en hann vildi lítið tjá sig um málið. Samkvæmt heimildum blaðsins er þetta í fjórða eða fimmta sinn sem Jón Gerald kemur til yfirheyrslu. Gagnrýnt hefur verið hversu langan tíma rannsóknin tekur, en tvö ár munu hafa liðið frá því lögregla réðist inn í höfuðstöðvar Baugs þar til endurskoðunarfyrirtæki var falið að skoða 33 mánaðarlega reikninga sem Jón Gerald og forsvarsmenn Baugs greindi á um strax í upphafi. Hvorki náðist í Jón Ásgeir Jóhannesson, forstjóra Baugs, né Tryggva Jónsson, fyrrum forstjóra. Báðir hafa vísað á bug sakargiftum þeir eru bornir. Jón H. Snorrason, yfirmaður efnahagsbrotadeildar Ríkislögreglustjóra, segist ekki vilja tjá sig um gang rannsóknarinnar að öðru leyti en því að hún standi enn.