Par dæmt í fangelsi

Maður og kona voru í gær dæmd í fangelsi fyrir innbrot og þjófnaði. Þau stálu meðal annars fartölvu úr bifreið og gerðu tilraun til þess að brjótast inn í skóla í Hörgárbyggð en flúðu þegar þjófavarnarkerfi skólans fór í gang. Maðurinn fékk tólf mánaða óskilorðsbundið fangelsi á meðan konan fékk tvo mánuði skilorðsbundið. Maðurinn á langan brotaferil að baki, hann hefur hlotið alls 25 refsidóma fyrir ýmiskonar brot frá árinu 1990. Hann rauf skilorð með brotunum sem hann var dæmdur fyrir nú, en hann hafði skömmu áður fengið reynslulausn úr fangelsi. Konan hafði ekki áður hlotið refsidóma.