200 þúsund á málaskrá lögreglu

Fjöldi íslenskra ríkisborgara á svokallaðri málaskrá Ríkislögreglustjóra samsvarar öllum Íslendingum á aldrinum 17-80 ára. Á skránni voru um miðjan þennan mánuð skráð nöfn 201.278 einstaklinga en Íslendingar á aldrinum 17-79 ára voru 200.789 um síðustu áramót samkvæmt tölum Hagstofunnar. Að sögn Jónmundar Kjartanssonar yfirlögregluþjóns hjá Ríkislögreglustjóra gilda strangar reglur um aðgang að skránni en engu að síður hafa allir lögreglumenn landsins aðgang að henni fimm ár aftur í tímann. Ýmis svæði hennar eru þó einungis aðgengileg yfirmönnum. Skráin sem er miðlægur gagnagrunnur var tekin í notkun árið 1988 og þá voru færð inn í hana tölvugögn frá Rannsóknarlögreglunni og Lögreglunni í Reykjavík, þannig að hún nær ein tuttugu ár aftur í tímann. Ástæðan fyrir öllum þessum fjölda á skránni er að allir sem hafa með einhverjum hætti tengst lögreglumálum á þessu tímabili, fara sjálfkrafa inn á skrána. Þetta á við um alla þá sem kæra mál, komast með einhverjum hætti í kast við lögin, hafa lent í slysum, eru vitni og þar fram eftir götunum. Það sem er skráð er nafn, kennitala, lögheimili og dvalarstaður. Jónmundur segir alla meðferð skráðra upplýsinga hafa breyst verulega til batnaðar með reglugerð um meðferð persónuupplýsinga hjá lögreglu sem sett var 2001. "Þannig getur hver sem er sent okkur línu og farið fram á að fá vitneskju um þær upplýsinga sem um hann eru skráðar í kerfi lögreglunnar og við veitum þær. Og ef þær eru sannarlega ranglega skráðar, leiðréttum við þær að sjálfsögðu", segir Jónmundur Kjartansson.