Stúlkur líklega ekki kærðar

Þrjár kínverskar stúlkur sem voru stöðvaðar ásamt ungum kínverskum manni og fylgdarmanni á fimmtugsaldri frá Singapúr eru 15 til 17 ára. Fylgarmaðurinn hefur verið úrskurðaður í gæsluvarðhald. Við yfirheyrslur í dag sögðust stúlkurnar vera undir lögaldri og ef það reynist vera rétt má ætla að staða þeirra breytist úr sakborningum í þolendur. Aldur piltsins liggur ekki enn fyrir en ungmennunum hefur verið komið fyrir á gistiheimili í Reykjanesbæ í umsjón lögreglunnar á Keflavíkurflugvelli. Talið er að fylgdarmaðurinn, sem fæddur er árið 1961, hafi verið að aðstoða ungmennin við að komast ólöglega til Bandaríkjanna en fólkið var á leið frá Lundúnum til Orlando. Sveinn Andri Sveinsson var lögmaður tveggja stúlknanna og fylgdarmannsins en nú þurfa stúlkurnar hans líklega ekki lengur við. Sveinn segir að við yfirheyrslu eftir hádegi í dag hafi komið í ljós að önnur stúlknanna hafi verið undir lögaldri og þá hafi málið gerbreyst. Menn hafa verið dæmdir í fangelsi hér á landi fyrir að smygla fólki ólöglega á milli landa en ekki eru dæmi um að reynt hafi verið að smygla svo ungu fólki. Ungmennin verða trúlega ekki ákærð fyrir að hafa framvísað vegabréfum sem ekki eru í þeirra eigu eins og venja er í málum sem þessum. Sveinn segir útlit fyrir að sakarefnið sé það að maður hafi aðstoðað við að flytja börn milli landa og réttarkerfið hér á landi líti það mun alvarlegri augum þegar börn eigi í hlut. Líklegt er talið að ungmennin fjögur komi til með að leita hælis hér á landi en útlit er fyrir að þau hafi ekki að neinu að hverfa í heimalandi sínu. Maðurinn var Héraðsdómi Reykjaness úrskurðaður í gæsluvarðhald til föstudagsins í næstu viku.