Barnungar stúlkur seldar mansali

Fjögur ungmenni voru handtekin með ólögleg vegabréf á Keflavíkurflugvelli á leið til Bandaríkjanna síðasta þriðjudag. Að sögn Jóhanns R. Benediktssonar, sýslumanns á Keflavíkurflugvelli, voru ungmennin á leið frá London til Bandaríkjanna með fylgdarmanni sem einnig var handtekinn. Hann hefur nú verið úrskurðaður í gæsluvarðhald til föstudagsins 27. maí grunaður um mansal. "Það liggur nær ljóst fyrir að tilgangurinn var að komast ólöglega til Bandaríkjanna," segir Jóhann. "Vegabréfin eru ófölsuð, svokölluð sviplík vegabréf þar sem myndin í vegabréfunum líkist mjög ungmennunum. Þetta eru ein erfiðustu tilfellin sem koma upp", segir Jóhann. Fólkið er búið að vera á ferðalagi síðan í lok mars og hefur því komið víða við á leiðinni til Bandaríkjanna. "Við komumst að því þegar verið var að grennslast fyrir um málið að stúlkurnar þrjár sem voru í för með manninum eru allar undir lögaldri," sagði Eyjólfur Kristjánsson fulltrúi sýslumanns. Sveinn Andri Sveinsson er skipaður verjandi fylgdarmannsins og var fyrst um sinn réttargæslumaður tveggja stúlknanna. Hann segir að um leið og upp komst um aldur stúlknanna sem eru sennilega fæddar um 1989 hafi yfirheyrslum verið hætt og stúlkunum komið í umsjá barnaverndaryfirvalda. Fólkið þurfti ekki að fara í gegnum hefðbundið vegabréfaeftirlit þar sem það kom frá London sem er utan Schengen-svæðisins og var á leið til Bandaríkjanna sem einnig er utan Schengen og fór því ekki út fyrir neðri hæð nýju flugstöðvarbyggingarinnar. Það var því fyrir árvekni starfsmanna sýsluembættisins að fólkið var gripið en ekki hefðbundið eftirlit. Tilfelli sem þetta hafa áður komið upp hér á landi og vilja yfirvöld senda þeim sem stunda ólöglega fólksflutninga þau skilaboð að hart sé tekið á slíkum málum hér. Stjórnvöld hafa nýverið undirritað samkomulag um að hefta mansal og í því samkomulagi er fólgið að réttindum fórnarlamba mansals skuli sýna virðingu. Jóhann R. Benediktsson segir svo munu vera í þessu máli.