Ríkið sýknað í tóbaksdómi

Á næstu vikum verður tekin ákvörðun um hvort áfrýjað verður dómi Héraðsdóms Reykjavíkur þar sem íslenska ríkið var sýknað af kröfum tóbaksframleiðandans British American Tobacco um birtingu kynningartexta um tóbak og um sýnileika tóbaksvara í hillum verslana. Íslensk tóbaksvarnarlög setja bæði framsetningu og umfjöllun um tóbak skorður. Jakob R. Möller, lögmaður British American Tobacco, segir skjólstæðinga sína ekki enn hafa séð dóminn og því ekki tekið afstöðu til áfrýjunnar. "Fyrst þarf að þýða dóminn sem er 64 síður og kynna hann fyrir forsvarsmönnum fyrirtækisins," sagði hann.