Bifröst breytti lífi mínu

"Ég starfa jafnt við verkefnisstjórnun og kynningar og almannatengsl. Það er rosalega gaman og það er alltaf eitthvað nýtt á hverjum degi. Ég er mikið í samskiptum við eldri nemendur, nýja nemendur og áhugasama nemendur þannig að ég er í raun alltaf að tala við fólk og það finnst mér frábært," segir Agnes. "Verkefnisstjórastarfið felst í því að ég sé um öll námskeið á Bifröst sem og að þróa og móta ný námskeið. Mörg námskeiðin hafa auðvitað verið mótuð áður en ég kom til starfa en ég held áfram að þróa þau. Þegar ég er að móta námskeið lít ég aðallega á hvað skólinn stendur fyrir. Í 87 ár höfum við menntað fólk til stjórnunarstarfa og höfum við reynt að þróa stjórnunarnám fyrir sjómenn, bankamenn og konur í rekstri svo dæmi séu tekin. Ég reyni að fylgja stefnu skólans og fara ekki út fyrir hana," segir Agnes sem er þá væntanleg umkringd framtíðar ráðamönnum þjóðarinnar. "Jú, jú ég er umkringd framtíðarstjórnendum allan daginn. Sjálfur forsætisráðherra vor útskrifaðist úr gamla skólanum þannig að þetta er mikill fyrirmannaskóli," segir Agnes og hlær dátt. Ekki má gleyma því að Agnes starfar líka við kynningar og almannatengsl og er það ekki síður mikilvægur þáttur af starfi skólans. "Ég fer í flesta framhaldsskóla landsins og kynni skólann. Síðan tek ég á móti alls kyns félögum, hópum og eldri nemendum og tek þá í kynningartúr um skólann. Ég vil taka persónulega á móti fólki og sýna þeim staðinn. Síðan svara ég flestum fyrirspurnum sem koma frá fólki sem er áhugasamt um námið hér á Bifröst," segir Agnes sem líkar vel á Bifröst. "Það hjálpast allir að hér og það eru forréttindi að fá að vinna þessa vinnu. Ráðamenn leyfa mér virkilega að reyna á mig og láta mig fá meiri ábyrgð þannig að ég kynnist eiginlega öllum hliðum skólans." Líf Agnesar hefur svo sannarlega tekið stakkaskiptum eftir að hún steig fyrst fæti inn í skólahúsnæðið á Bifröst. "Ég kom hér inn sem einstaklingur árið 1999 og nú á ég mann og barn eftir dvölina hér. Þessi skóli er algjörlega búinn að breyta lífi mínu. Ég útskrifaðist sem viðskiptafræðingur árið 2002 og fékk þá starf sem kynningar- og almannatengslafulltrúi með skóla. Þá var skólinn að stækka og um 120 nemendur skráðir. Nú eru hins vegar um 500 eða 600 í námi með fjarnámi og símenntun þannig að það þurfti að fjölga starfsmönnum. Árið 2003 fór í meistaranám með kynningar- og almannatengslastarfinu og síðasta haust bauðst mér tækifæri til að vera verkefnisstjóri og þáði það. Þetta er rosalega gott tækifæri og ég sé ekki eftir því að hafa þegið það."