25 Írakar hafa fallið í morgun

Tuttugu og fimm Írakar féllu í árásum hryðjuverkamanna í morgun, þar af ellefu lögreglumenn. Sjálfmorðsárás var gerð á mosku sjíta í Bagdad við föstudagsbæn í morgun. Svo virðist sem bíl hlöðnum sprengiefni hafi verið ekið á moskuna. Fjórtán féllu og fjöldi særðist. Árásin hefur vakið ótta um að trúarhópadeilur séu í uppsiglingu á milli súnníta og sjíta. Fyrr í morgun gerði hópur hryðjuverkamanna árás á lögreglustöð í suðvesturhluta borgarinnar. Þeir vörpuðu sprengjum á stöðina og ruddust síðar inn, eltu þar uppi lögreglumenn og drápu. Ellefu lögreglumenn lágu í valnum. Hryðjuverkahópur Abu Musabs al-Zarqawis, leiðtoga al-Kaída í Írak, sendi frá sér yfirlýsingu þess efnis að árásirnar hefðu verið verk samtakanna. Árásir hafa ekki verið tíðar undanfarið, frá því að hernaðaraðgerðum lauk í Fallujah, en það kemur þó ekki á óvart að árásir séu gerðar. Því hafði verið spáð að þeim myndi fjölga í aðdraganda frjálsra kosninga í landinu sem eiga að fara fram í lok janúar. Bandaríkjamenn hafa ákveðið að fjölga hersveitum sínum í landinu og verða að því loknum hundrað og fimmtíu þúsund bandarískir hermenn að störfum í Írak. Súnnítar hafa miklar áhyggjur af áframhaldandi árásum og áhrifum þeirra á kosningarnar. Áhrifamenn úr röðum þeirra hafa lýst þeirri skoðun sinni að fresta beri kosningunum en sjítar eru því algjörlega mótfallnir og segja það jafngilda sigri hryðjuverkamannanna. Bandaríkjamenn hafa þvertekið fyrir frestun.