Engin vitni að brottnáminu

Ekki hefur enn borist ábending frá neinum sem telur sig hafa orðið vitni að því þegar níu ára stúlku var rænt í Kópavogi fyrir rúmri viku síðan. Þær ábendingar sem lögreglunni hafa borist beinast allar að mönnum sem falla undir lýsingu stúlkunnar á mannræningjanum. Lögreglan hefur rætt við á annan tug manna sem lýsingin á við en enginn þeirra hefur verið handtekinn. Friðrik Smári Björgvinsson, yfirlögregluþjónn í Kópavogi, segir flestar ábendingarnar hafa komið fyrst eftir að óskað var eftir upplýsingum en þeim hafi farið fækkandi.