Fylgjandi auknum orkurannsóknum

Árni Þór Sigurðsson, oddviti Vinstri - grænna í borgarstjórn, segir ekkert athugavert við afstöðu flokksins til hugsanlegrar virkjunar Skjálfandafljóts. Vinstri - grænir séu fylgjandi auknum orkurannsóknum. Eins og sagt hefur verið frá á Stöð 2 þá samþykkti fulltrúi Vinstri - grænna að Orkuveitan hefði forgöngu um virkjun Skjálfandafljóts sem þýddi að landflæmi á hálendinu á stærð við borgarland Reykjavíkur hyrfi undir vatn. Árni Þór segir þetta ekki stangast á við stefnu flokksins. Það komi til greina að virkja, ef orkan er ekki notuð í mengandi stóriðju. Árni Þór segir að til þess að það verði gert með skynsamlegum hætti verði að efla mjög rannsóknir á sviði orkumála. Því sé ekki óeðlilegt að fulltrúi flokksins í stjórn Orkuveitunnar leggist ekki gegn því að sótt sé um rannsóknarleyfi. Árni segir að það skipti ennfremur miklu máli hver niðurstaða umhverfismats verði.