Dæmdur fyrir brotin í Abu Ghraib

Fyrsti hermaður þeirrar deildar bandaríska hersins, er sér um njósnir og upplýsingaöflun, sem dreginn var fyrir rétt fyrir brotin í Abu Ghraib fangelsinu í Bagdad, fékk í dag átta mánaða fangelsisdóm, lækkun í tign og brottvikningu úr hernum. Misþyrmingarnar á föngunum ollu mikilli hneykslan þegar upp um þær komst fyrr á árinu eins og frægt varð og voru vatn á myllu andstæðinga Íraksstríðsins. Hermaðurinn, Armin Cruz að nafni, viðurkenndi ákærurnar sem bornar voru á hann um misþyrmingar og að fyrirskipa pyntingar á föngum. Varnarmálaráðuneyti Bandaríkjanna er sagt bíða mikla álitshnekki vegna dómsins því það hafði áður fullyrt að brotin sem áttu sér stað í Abu Ghraib hafi einungis verið framin af undirmönnum í hernum og að þeirra eigin frumkvæði. Teikningin er af Cruz í réttarsalnum.