Sigmundur Davíð opnaði sig um viðtalið fræga: „Snerist um að koma höggi á flokkinn í gegnum mig“

Vorfundur Framsóknarflokksins var settur í Rúgbrauðsgerðinni í Reykjavík klukkan ellefu. Fundinn sitja miðstjórnarmenn flokksins sem eru um tvö hundruð. Þeirra á meðal eru þingmenn og ráðherrar flokksins. Svo og fulltrúar úr öllum kjördæmum og fyrrverandi þingmenn og ráðherrar. Sigmundur Davíð Gunnlaugsson, formaður flokksins, hélt ræðu við upphaf fundarins.

Boðaði Sigmundur óhefðbundna og persónulegri ræðu en áður en Sigmundur fór yfir víðan völl í ræðu sinni. Fór hann sérstaklega yfir sjónvarpsviðtalið fræga sem sænskir sjónvarpsmenn tóku við hann í ráðherrabústaðnum og sýnt var í Kastljósi. 

„Það var búið að skrifa handritið fyrir fram. Viðtalið snerist ekki um að finna sannleikann, það snerist um að koma höggi á flokkinn í gegnum mig,“ sagði Sigmundur Davíð.

Sagði Sigmundur að hann hafi ætlað sér að sleppa því að fara í viðtalið en sjónvarpsmennirnir hafi sótt það stíft að fá hann í viðtal. Því hafi hann látið til leiðast og ákveðið að fara í viðtalið eftir að hafa fengið útlistun á því hvernig það myndi fara fram.

„Ég sé að það eru margar myndavélar í herberginu og greinilega mikið við haft,“ sagði Sigmundur sem hafi farið að spyrja sænska blaðamanninn aftur út í hvert inntak viðtalsins væri. „Hann segir að viðtalið sé um hvað allt sé frábært á Íslandi, Svíar þurfi að heyra hvað við séum að gera góða hluti. Þá fer hann ræða við mig um persónuleg málefni og er bara í því að vera besti vinur minn. Maður hafði sjaldan hitt svona vinsamlegan mann.“

 

„Þá rennur upp fyrir mér að það væri búið að plata mig “

Sigmundur sagði að honum hefði fundist skrýtið að sjónvarpsmaðurinn skyldi einungis lesa upp spurningar, án þess að hlusta á svörin. Svo hafi allt í einu verið skipt um umræðuefni.

„Þá rennur upp fyrir mér að það væri búið að plata mig. Meðan ég er að hugsa í hverju ég er lentur kemur fát á mig og ég er ekkert að hugsa um hvað ég er að tala um. Þá nefna þeir hvaða þeir tala um, hvað mér finnist um skattsvik og skattaskjól. Fyrirtæki eiginkonu minnar hefur aldrei verið í skattaskjóli, það var auðvelt að svara í þvi. Ég sá að það að halda áfram í viðtalinu myndi bara gera illt verra. Ég ákvað að fara og kveðja,“ sagði Sigmundur.

Stóru mistökin hafi hann hinsvegar gert eftir viðtalið.

„Við fórum í það næstu tvær vikurnar að afla gagnanna fyrir þess menn. Alltaf var reynt að svara þeim spurningum sem þeir vildu fá. Svo kom á daginn að þetta snerist aldrei um að afla upplýsinga. Þetta snerist um að halda mér uppteknum í tvær til þrjár vikur. Það var búið að skrifa handritið fyrir framan og búið að æfa það hvernig mætti láta viðtalið líta sem verst út.“

Fundurinn í dag er fyrsti stóri fundur Framsóknarflokksins sem haldinn er frá því að Sigmundur Davíð sagði af sér sem forsætiráðherra og Sigurður Ingi Jóhannsson tók við. Sigmundur lýsti því yfir í lok maí að hann ætli sér að sitja áfram á þingi og að hann vilji leiða flokkinn áfram. Aðeins ræða Sigmundar var opin fjölmiðlum en fundurinn á að standa til klukkan sex. Þar fara fram almennar umræður auk þess sem Sigurður Ingi mun halda ræðu.

Nokkrir þingmenn flokksins hafa kallað eftir því að forysta flokksins verði endurnýjuð fyrir þingkosningar sem verða væntanlega í haust. Slíkt verður að gera á flokksþingi. Næsta flokksþing er ekki á dagskrá fyrr en á næsta ári. Ákvörðun um að flýta því er í höndum miðstjórnarinnar og skýrist það því líklega á fundinum í dag hvort að flokksþingi og forystukjöri verði flýtt.