Hlynur tryggði FH stigin tvö

FH vann mikilvægan sigur á ÍBV, 24-23, í Olís-deild karla í kvöld.

Með sigrinum komst FH upp úr fallsæti en liðið er nú með 12 stig í 8. sæti.

ÍBV er hins vegar í 5. sæti en liðið hefur tapað fimm af síðustu sex leikjum sínum.

Eyjamenn voru með yfirhöndina framan af og eftir fimm mínútna leik var staðan 1-5, þeim í vil. Þá var Halldóri Sigfússyni, þjálfara FH, nóg boðið og hann tók leikhlé.

Hafnfirðingar komu öflugir til leiks að því loknu, skoruðu sjö mörk gegn tveimur og náðu forystunni, 8-7.

FH leiddi með einu marki í hálfleik, 13-12, en Eyjamenn byrjuðu seinni hálfleikinn mun betur. Varnarleikur ÍBV var sterkur og FH-ingar skoruðu aðeins þrjú mörk á fyrstu 17 mínútum seinni hálfleiks.

Í stöðunni 16-18, fyrir ÍBV, kom góður 4-1 kafli hjá FH sem náðu aftur forystunni. Lokamínúturnar voru svo gríðarlega spennandi. Einar Rafn Eiðsson kom FH í 23-21 með sínu sjötta marki þegar fjórar mínútur voru eftir en Eyjamenn jöfnuðu í 23-23 með mörkum frá Brynjari Karli Óskarssyni og Einari Sverrissyni.

Það var svo Hlynur Bjarnason sem tryggði FH stigin tvö þegar hann skoraði 24. mark liðsins. Gestirnir fengu tækifæri til að jafna undir lokin en Ágúst Elí Björgvinsson stóð vaktina vel í marki FH.

Einar Rafn var markahæstur í liði FH í kvöld með sex mörk en Benedikt Reynir Kristinsson kom næstur með fimm.

Grétar Þór Eyþórsson var atkvæðamestur Eyjamanna með sex mörk en Einar gerði fimm.

Mörk FH:

Einar Rafn Eiðsson 6, Benedikt Reynir Kristinsson 5, Jóhann Birgir Ingvarsson 4, Hlynur Bjarnason 3, Daníel Matthíasson 2, Andri Berg Haraldsson 2, Halldór Ingi Jónasson 2.

Mörk ÍBV:

Grétar Þór Eyþórsson 6, Einar Sverrisson 5, Kári Kristjánsson 3, Brynjar Karl Óskarsson 3, Svanur Páll Vilhjálmsson 2, Theodór Sigurbjörnsson 2, Dagur Arnarsson 1, Andri Heimir Friðriksson 1.