Spurðu stuðnings­menn Man United hvaða leik­menn eigi skilið að vera á­fram

Þetta er versta byrjun félagsins í fjóra áratugi og alvarlegur skortur á sjálfstrausti hjá liði sem virðist brotna við fyrsta mótlæti þessa dagana.

En það hljóta einhverjir leikmenn að eiga það skilið að klæðast áfram búningi félagsins. Hörðustu dómararnir eru oft stuðningsmenn félaganna á myrkum tímum eins og á Old Trafford í dag.

Sport Bible fór af stað og hitti á nokkra harða stuðningsmenn Manchester United og spurði út í hvaða leikmenn United eiga skilið að vera áfram.

Sá fyrsti nefndi varnartröllið Harry Maguire sem hann telur að hafi gert góða hluti fyrir félagið. Einn heldur því fram að Benjamin Sesko sé betri en Erling Haaland en það er væntanlega fámennt í þeim klúbbi.

Það má heyra nöfn eins og Bruno Fernandes, Benjamin Sesko, Matheus Cunha og Bryan Mbeumo en stuðningsmennirnir eru ekki mikið að nefna þá sem spila aftar á vellinum.

Svo eru það þeir sem vilja bara allsherjarhreinsun í leikmannahópnum.

„Mér finnst við bara ekki vera með neina heimsklassa leikmenn,“ sagði einn.

„Þeir eru bara ekki nógu góðir,“ sagði einn gamalreyndur sem þekkir svo sannarlega betri tíma hjá félaginu.

„Sjáðu bara Chelsea. Þeir voru með nokkra slaka leikmenn en losuðu sig bara við þá eitt sumar. Af hverju getum við það ekki? Ef við værum klúbbur með alvöru metnað til að vera stór klúbbur þá ættum við að haga okkur eins og stór klúbbur,“ sagði sá sem vill sjá brunaútsölu. Hann var ekki hættur.

„Það eru nokkrir leikmenn búnir að vera hér alltof lengi. Þeir voru kannski ágætir einu sinni en Luke Shaw er búinn að vera hjá félaginu síðan 2014. Hann ætti ekki að spila fyrir United árið 2016.“

„Við ættum að halda Bruno [Fernandes], [Benjamin] Sesko, [Matheus] Cunha og [Bryan] Mbeumo. Ég er hrifinn af þeim, þeir eru góðir,“ sagði einn sem er sáttur við sóknarvopn félagsins.

„Vandamálið er tvíþætt þegar kemur að leikmannahópnum. Suma vantar rétta hugarfarið en aðra vantar gæðin. Við getum unnið deildina en til þess þurfum við nokkra góða félagsskiptaglugga í viðbót. Við vinnum ekki neitt með þessum leikmönnum,“ sagði stuðningsmaður sem hefur mikið til síns máls.

Það má annars sjá innslagið hér fyrir neðan.