Klefinn þagnaði: „Eigin­lega bara mjög ó­þægi­legt“

U21 árs landslið Íslands sem fór á EM í Danmörku árið 2012 var að stórum hluta skipað leikmönnum sem áttu eftir að verða hluti af gullaldarlandsliði Íslands sem fór síðar á EM 2016 og HM 2018, fyrst A-landsliða. Hólmar segist hafa notið sín vel með liðinu.

„Það var bara gaman sko. Það er náttúrulega auðvelt að segja það núna, en þú sást alveg að það var svona sérstaklega mikill vilji í hópnum og gír að ná langt bæði persónulega og sem lið. Það var rosa andi yfir þessu,“

„Svo er náttúrulega líka sérstakt að því leytinu til að pabbi er þjálfari þarna á þeim tíma. En maður fann alveg að það var eitthvað í farvatninu þarna,“ segir Hólmar um U21 árs liðið sem fór á EM í aldursflokknum í fyrsta skipti íslenskra liða árið 2012.

Ekki alltaf einfalt

Hólmar hafði þar orð á því að faðir hans stýrði liðinu. Eyjólfur Sverrisson var þjálfari U21 árs landsliðsins á árunum 2009-2018 (og reyndar einnig árin 2004-2005).

En hafði það áhrif á Hólmar, eða var það sérstakt fyrir hann að faðir hann væri að þjálfa hann?

„Það er ekki þægilegt sko. Það er eiginlega bara mjög óþægilegt að pabbi þinn sé þjálfari. Bara eins og er í liðum, menn hafa alltaf út á eitthvað að setja, einhverjir skipti á skoðunum. En ég held að menn hafi alveg passað sig að vera ekki að segja alltaf frá því,“

Mann hafi gætt sín þegar Hólmar var nærri ef þjálfarinn var ræddur. „Hólmar er mættur, passaðu þig,“ hafi menn hvíslað í klefanum að sögn Hólmars.

En lenti ykkur feðgum eitthvað saman á þessum tíma?

„Mér og pabba? Nei. Ég gerði bara eins og mér var sagt.“

Þú varst leiðtoginn í því bara að fylgja honum.

„Já, „sir, yes, sir“.“