Vondur dagur varð enn verri fyrir fyrir­liða Man. United

Það er ekki nóg með að Bruno Fernandes hafi verið heillum horfinn í skellinum vandræðalega við Como-vatn heldur var brotist inn á heimili Fernandes á meðan Man United var að spila.

Lögreglan rannsakar innbrot á heimili Bruno Fernandes sem átti sér stað þegar hann var á heimleið frá Ítalíu með Manchester United eftir tap gegn Como.

Talið er að fjölskylda Fernandes hafi ekki verið heima á þeim tíma og lögreglan mætti fljótt á vettvang.

„Um klukkan 20:30 miðvikudaginn 21. október var lögreglu tilkynnt um grunsamlegar mannaferðir við heimilisfang á Alderley Park-svæðinu í Nether Alderley. Sá sem hringdi tilkynnti um þrjá óþekkta menn í bakgarði nágrannaeignar,“ segir í yfirlýsingu frá lögreglunni í Cheshire.

„Lögreglumenn fóru á vettvang en við komu fundust engin ummerki um hina grunuðu. Lögreglumenn komust hins vegar að því að brotist hafði verið inn á heimilið og nokkrum munum stolið. Rannsókn á málinu er hafin og hún stendur enn yfir.“

Þetta hörmulega kvöld á Ítalíu þýddi að Bruno og félagar hafa ekki fagnað sigri í síðustu sjö leikjum. Fernandes setti eftir leikinn spurningarmerki við nálgun knattspyrnustjórans Michael Carrick.

Úrslitin, ásamt ummælum Fernandes, höfðu vakið alvarlegar spurningar um framtíð Carrick fyrir heimaleikinn gegn Bournemouth í ensku úrvalsdeildinni á sunnudag, en hann mun áfram stýra liðinu í þeim leik.

Fyrirliðinn Fernandes hefur verið aðeins svipur hjá sjón miðað við frammistöðu sína á síðasta tímabili það sem af er þessu tímabili. Fernandes fullyrti að það hefði verið ákvörðun þjálfarateymisins „að pressa ekki maður á mann og skilja stundum eftir smá svæði fyrir aftan“ í Como.