Þurfti að hætta við æfingu eftir mót­mæli leik­manns

Samkvæmt heimildum BBC settist Tolu Arokodare á miðjan völlinn þegar Wolves átti að vera á æfingu. Hann neitaði að færa sig og neyddist Cesar Peixoto, þjálfari Wolves, að hætta við æfinguna.

Arokodare langar að fara frá Úlfunum en tvö lið hafa gert tilboð í leikmanninn. Wolves neitaði tilboði ítalska liðsins Fiorentina í leikmanninn en samþykkti tilboð tyrkneska liðsins Trabzonspor. Arokodare hefur engan áhuga á að fara til Tyrklands en vill gjarnan fara til Fiorentina á Ítalíu og krafðist þess að félagið samþykkti tilboð Fiorentina.

Þetta er ekki í fyrsta skipti sem Arokodare er til vandræða hjá Wolves en hann lenti í ágreiningi við Mateus Mane, liðsfélaga sinn hjá Wolves, í apríl.

Það er því nóg um að vera í herbúðum Cesar Peixoto sem var ráðinn þjálfari Wolves í síðasta mánuði. Markmið hans er að koma liðinu aftur í ensku úrvalsdeildina en liðið féll á síðasta tímabili og spilar í ensku B-deildinni.