„Ekki bara handbolti, heldur lífið líka“

Elín Klara hefur verið lykilmaður Hauka og íslenska landsliðsins undanfarin ár en tók skrefið út til Sävehof síðasta haust. Það hefur reynst heillaskref.

„Heilt yfir er ég ótrúlega sátt með árið. Við byrjuðum með frekar nýtt lið en mér fannst stígandinn í liðinu mjög mikill yfir allt árið og svo endum við þetta eiginlega fullkomnlega. Heilt yfir er ekki yfir miklu til að kvarta,“ segir Elín Klara í Sportpakkanum á Sýn.

Hvernig var að aðlagast nýju lífi í nýju landi?

„Ég viðurkenni alveg að það tók nokkra mánuði að venjast og flytja að heiman. Maður er að læra svo margt og þroskast svo mikið með. Þetta er ekki bara handbolti, heldur lífið líka,“

„Þetta var krefjandi til að byrja með en eftir áramót fannst mér ég farin að spila minn leik,“ segir Elín Klara.

Hverjar voru mestu áskoranirnar?

„Maður er meira einn. Ég hafði búið heima með systkinum mínum og hafði kærastann minn. Maður saknar töluvert. En svo er það allt þetta, að elda og svoleiðis. Maður kemur ekkert heim til mömmu í mat lengur,“ segir Elín sem hefur þar af leiðandi bætt sig í eldhúsinu.

„Það gengur bara ágætlega. Maður heldur sömu rútínunni, eldar eitthvað og á það klárt þegar maður kemur heim af æfingum.“

Sænskan er þá hægt og rólega að koma.

„Já, já. Ég skil mjög mikið og maður þarf bara að byrja að tala, fara út fyrir þægindarammann og byrja að tala.“

Eitt ár enn í Svíþjóð

Elín Klara var valin besti leikmaður deildarinnar eftir að Sävehof tryggði sér sænska meistaratitilinn. Elín hafði unnið bikartitil með Haukum hér heima en vann í vor sinn fyrsta landstitil. Tilfinningin var allt að því ólýsanleg.

„Bara ólýsanleg. Þetta var ótrúlega skemmtilegt. Þessi maí-mánuður var bara einn sá skemmtilegasti sem ég hef upplifað.“

Sænskir blaðamenn höfðu orð á því að hún væri alltof góð fyrir deildina í Svíþjóð og ætti að taka næsta skref. Hún er hins vegar spennt fyrir einu ári til í Svíþjóð en eftir það stefnir hún á næsta skref.

„Ég er mjög glöð þarna og er ótrúlega ánægð að hafa tekið þetta skref út til Svíþjóðar. Ég held það hafi verið mjög flott. Ég tek eitt ár í viðbót þarna og auðvitað er bara markmiðið að taka þrennuna. Við tókum ekki bikarinn í fyrra svo ég á það eftir,“ segir Elín Klara.