Metið kol­féll í Lauga­vegs­hlaupinu

Yfir 700 hlauparar tóku þátt og lögðu af stað frá Landmannalaugum í morgun, hina krefjandi leið yfir Laugaveginn að Húsadal í Þórsmörk, við nokkuð góðar aðstæður hvað veður snertir. Smávægilegur mótvindur gerði vart við sig og það hlýnaði þegar nær dró endamarkinu en þar biðu fjölmargir áhorfendur eftir keppendum og fögnuðu glæsilegum árangri.

Tove Alexandersson vann kvennaflokkinn á 4:14:08 klukkutímum, algjörlega stórkostlegum tíma, í sínu fyrsta Laugavegshlaupi. Hún bætti þannig brautarmet Andreu Kolbeinsdóttur sem átti fjóra bestu tíma kvenna í laugavegshlaupinu. Brautarmet Andreu frá árinu 2023 var 4:22:56 klukkutímar.

Tove vann feykilega öruggan sigur í kvennaflokki en næst á eftir henni varð Íris Anna Skúladóttir á 4:57:38 og í þriðja sæti varð Helga Bergsdóttir á 5:02:35.

Þorsteinn Roy Jóhannsson hljóp hins vegar hraðast allra en hann vann karlaflokkinn á 4:06:35 klukkutímum. Hann á þar með þrjá af sjö bestu tímum sem náðst hafa í brautinni en aðeins Arnar Pétursson og Þorbergur Ingi Jónsson hafa hlaupið hraðar í Laugavegshlaupinu. Bruatarmet Þorbergs frá árinu 2015 er 3:59:13 klukkutímar.

Bretinn Andrew Douglas varð í 2. sæti karla á 4:12:57 og í þriðja sæti varð Stefán Pálsson á 4:17:22.