Hagnaður Sam­herja nam um 8,5 milljörðum

Þetta kemur fram í tilkynningu á vef Samherja. Þar segir að hagnaður af rekstri (EBIT) hafi verið 7,3 milljarðar króna samanborið við 6,1 milljarðs króna hagnað árið áður og jókst hann því um tæplega 19 prósent á milli ára. Hagnaður eftir skatta nam tæplega 8,5 milljörðum. Aukinn rekstrarhagnaður er sagður skýrast öðru fremur af háu afurðaverði á botnfiskmörkuðum og traustum rekstri.

Eignir í lok árs námu 131,3 milljörðum króna og eigið fé nam 99,6 milljörðum króna. Eiginfjárhlutfall í árslok var 75,8 prósent.

Haft er eftir Baldvini Þorsteinssyni forstjóra að ársuppgjör Samherja sýni að grunnrekstur félagsins sé traustur og fjárhagur þess sterkur.

„Það gerir Samherja kleift að horfa til frekari fjárfestinga, einkum þeirra sem miða að því að auka samkeppnishæfni félagsins og þar með íslensks sjávarútvegs,“ segir Baldvin.

Forstjóraskipti á árinu

Í tilkynningunni segir að árið 2025 hafi verið viðburðaríkt hjá Samherja.

„Tímamót urðu þegar stofnendur félagsins, Þorsteinn Már Baldvinsson og Kristján Vilhelmsson, létu af störfum eftir 42 ára starf hjá félaginu eða frá stofnun þess. Þorsteinn Már í starfi forstjóra og Kristján framkvæmdastjóri útgerðarsviðs. Sjávarútvegur hefur verið ævistarf og ástríða þeirra beggja og náið samstarf þeirra hefur verið kjölfestan í rekstri Samherja alla tíð frá 1983.

Þá urðu einnig ákveðin tímamót í rekstri Samherja fiskeldis ehf. þegar nýir hluthafar, bæði innlendir og erlendir fjárfestar, komu inn í félagið í kjölfar fjármögnunar Eldisgarðs, nýrrar landeldisstöðvar fyrir lax, á Reykjanesi. Eftir breytingar á hluthafahópnum á Samherji hf. 61,5% eignarhlut í móðurfélagi Samherja fiskeldis eftir að hafa átt tæplega 100% hlutafjár í byrjun ársins.

Veiðar og vinnsla gengu vel

Árið 2025 var gott ár í veiðum, vinnslu, landeldi og sölu afurða. Samherji gerði út flota sjö fiskiskipa á árinu. Um er að ræða fjóra ísfisktogara, tvö uppsjávarskip og einn frystitogara. Ísfisktogarar félagsins lönduðu 26.691 tonni af fersku hráefni á síðasta ári. Mestur var aflinn í þorski eða 16 þúsund tonn og sem fyrr voru aðrar helstu botnfisktegundir ýsa, ufsi og karfi. Landaður afli ísfisktogara var að langstærstu leyti unninn í fiskvinnslum Samherja á Eyjafjarðarsvæðinu. Annars vegar í landvinnslunni á Dalvík og hins vegar í landvinnslu ÚA á Akureyri. Þessar fiskvinnslur tóku samtals á móti 33.166 tonnum af hráefni á árinu,“ segir í tilkynningunni.

Þá segir að uppsjávarskip Samherja hafi landað 51.287 tonnum af hráefni á árinu. Mest hafi verið landað af kolmunna eða 22.262 tonnum.

Athugasemd ritstjórnar: Í upphaflegri fyrirsögn fréttarinnar sagði að hagnaðurinn hafi verið um 11 milljarðar króna. Þar er um að ræða hagnaður fyrir skatta, en hagnaður eftir skatta nam 8,5 milljarðar króna. Fyrirsögninni hefur verið breytt.