Reyna að hefja leik á U.S. Open á ný

Bein útsending frá fyrsta keppnisdegi U.S. Open hefst klukkan fjögur í dag á Sýn Sport.

Fyrstu ráshópar voru farnir af stað í sína hringi þegar fresta þurfti leik vegna þoku. Þeir voru beðnir um að yfirgefa völlinn og núna fyrir klukkan eitt bárust tíðindi að því að mótið hæfist aftur klukkan 13.05 á íslenskum tíma.

Gunnlaugur Árni Sveinsson átti að hefja sinn hring rétt fyrir klukkan hálf sjö í kvöld en nú þykir nokkuð ljóst að hann muni fara seinna af stað í sinn hring í ljósi þess að leik var frestað í um tvær klukkustundir.

Búist var við því að veður gæti sett strik í reikninginn á mótinu, en þá aðallega hvað varðar vindstyrk. Þokan kemur mönnum kannski örlítið á óvart. 

Hvað vindinn varðar gætu það verið góðar fréttir fyrir þá sem eiga teig seint, eins og Gunnlaugur Árni, að fara seinna af stað en áætlað var. Þar með gæti versti vindurinn verið dottinn niður. 

Veðurspáin fyrir daginn gæti verið betri. Spáð er einhverri rigningu fyrri part dags og svo á að hvessa eftir því sem líður á daginn.