Fær einn lokaséns eftir á­fall á Spáni: „Ég var bara mjög hrædd“

Í undan­keppni fyrir heims­leikana í Ciu­dad Real á Spáni á dögunum lenti Bergrós í því að fá hita­slag og var hún flutt á nær­liggjandi sjúkra­hús eftir að hafa hvorki geta talað né gengið.

Hún kláraði hins vegar leikana og var í séns á far­miða þangað komandi inn í loka­dag mótsins. Það tókst ekki þá að tryggja sætið og skildi bitur reynsla eftir sig sár á sálinni sem er enn að gróa.

„Ég kem inn í mótið og far­miði á heims­leika Cross­Fit undir. Ég ætla að gera hvað sem er til að ná honum. Ég gef allt í fyrsta WOD-ið. Þetta er út í hitanum og það er mjög heitt,“ segir Bergrós í sam­tali við íþrótta­deild Sýnar.

„Ég næ mjög góðum árangri, var mjög ánægð með WOD-ið en þetta byrjar beint eftir WOD-ið. Þar sem mér líður ekki vel. Mér fer að líða verr og verr. Ég kemst inn í skuggann aðeins, næ ekki að fá líkams­hitann mikið niður. Þegar að ég var að labba til baka að bílnum þá fæ ég mjög slæma til­finningu í öllu kerfinu og get ekki labbað lengur. Ég missti svolítið meðvitund þar, þarf að setjast niður og það er kallað á sjúkra­liða.“

Tárast í hvert sinn sem hún hugsar um drauminn

Óþægi­legar aðstæður að vera í.

„Ég var bara mjög hrædd. Fór með sjúkra­bílnum upp á sjúkra­húsið og náði sem betur fer að taka mig saman sjálf. Það var ekki þörf á frekara inn­gripi. Ég er enn að reyna ná utan um þetta. Ég man heldur ekkert allt of mikið eftir þessu, var inn og út úr meðvitund. Ég fékk grænt ljóst til að halda keppni áfram en alla helgina var ég ekki ég sjálf. Alls ekki.“

Bergrós eltir áfram þennan stóra draum sinn að ná inn á heims­leikana og fær eitt tækifæri til viðbótar til að tryggja sig inn á leika þessa árs. Önnur undan­keppni, sú síðasta sem í boði er fyrir Bergrós, hefst í dag. Sjö sæti á heims­leikana í kvenna­flokki eru í boði.

„Það er náttúru­lega fullt af góðum konum að keppa. Ekki spurning. Mér líður hins vegar mjög vel með það sem að ég get. Ef ég næ að fram­kvæma hvert WOD fyrir sig eins vel og ég mögu­lega get líður mér mjög vel með þetta.“

Hvaða þýðingu hefði það fyrir þig að ná að gera þennan stóra draum að veru­leika?

„Í hvert einasta skipti sem ég hugsa um að komast á heims­leikana tárast ég. Mér finnst það segja svolítið mikið. Þetta er al­gjör draumur. Það myndi þýða allt saman fyrir mig.“