Draumurinn ekki dáinn hjá Bergrós

„Æi maður. Þetta var vægast sagt erfið helgi,“ skrifaði Bergrós á samfélagsmiðla sína. Hún lenti í vandræðum eftir fyrstu grein mótsins.

Andlega hliðin var aldrei vandamál

„Andlega hliðin var aldrei vandamál hjá mér, hún var jafn skörp og alltaf og ég var áköf í að berjast. Líkaminn minn hafði bara ekkert afl eftir fyrstu greinina. Það svíður illa þegar allt er undir, en ég barðist allt til enda og er stolt af því,“ skrifaði Bergrós.

„Til að gera langa sögu stutta gat ég hvorki gengið né talað um tíma. Blóðsykurinn minn sem og blóðþrýstingurinn mældist allt of lágur og ég missti meðvitund um stund,“ skrifaði Bergrós áður um atvikið.

Flytja þurfti Bergrósu á nærliggjandi sjúkrahús og þótti ekki tilefni til frekara inngrips þegar þangað var komið.

Hún gafst ekki upp og kláraði keppnina þar sem hún endaði í níunda sætinu. Hún á heiður skilinn fyrir það en því miður lenti hún í vandræðum í upphafi þar sem hún var að keppa í miklum hita ólíkt því sem hún er vön á Íslandi.

Bergrós vakti einnig athygli á því að Heimsleikadraumurinn er ekki dáinn hjá henni.

Þetta er ekki búið enn

„Núna er kominn tími til að drífa sig úr þessum hita og undirbúa sig fyrir undanúrslitin á netinu. Þetta er ekki búið enn,“ skrifaði Bergrós.

Það eru enn sjö sæti í boði hjá konunum í gegnum undanúrslitamót þar sem keppendur munu skila inn æfingum í gegnum netið.

Mótið fer fram dagana 11. til 15. júní. Bergrós fær tíu daga til að safna kröftum og undirbúa sig fyrir þessi átök.

Hún fær líka flotta kveðju frá umboðsmanninum Snorra Baron Jónssyni.

„Þú hefur ansi margt til að vera stolt af og ballið er ekki búið ennþá. Ég er ekki í nokkrum vafa um að þú neglir þetta í næstu viku. Allt í botn,“ skrifaði Snorri sem hefur séð marga skjólstæðinga sína tryggja sér sæti á heimsleikunum.