Haukur fær nýjan samning eftir ó­trú­lega leik­tíð

Haukur er 25 ára gamall og skrifaði í dag undir tveggja ára samning, til sumarsins 2028. Hann gekk í raðir Löwen síðasta sumar frá Dinamo Búkarest í Rúmeníu eftir að hafa verið leikmaður Kielce í Póllandi 2020 til 2024.

Óhætt að segja að hann hafi stimplað sig rækilega inn á fyrsta ári í bestu deild heims.

Haukur hefur spilað stórkostlega með Löwen í vetur og verið framlagshæsti leikmaður liðsins. Hann hefur verið sérstaklega iðinn við kolann í að leggja upp fyrir liðsfélaga sína.

Haukur hefur lagt upp 177 mörk fyrir félaga sína og er lang stoðsendingahæstur í þýsku úrvalsdeildinni. Næsti maður hefur lagt upp 137.

Þar að auki er Haukur fimmti markahæstur í deildinni með 190 mörk. Hann hefur spilað allan 31 leik liðsins í deildinni á leiktíðinni og því skorað að meðaltali 6,1 mark í leik og lagt upp að meðaltali 5,7 mörk. Því hefur hann alls komið að tæplega tólf mörkum í hverjum leik í vetur.