Aron fagnaði sigri eftir bráða­bana

Leiknir voru tveir hringir á mótinu sem fram fór á Suðurnesjum. Fyrsti hringurinn á Hólmsvelli í Leiru. Annar hringurinn átti að fara fram á Kirkjubólsvelli við Sandgerði á laugardaginn en var aflýst vegna veðurs.

Mótið var því aðeins tveir hringir í stað þriggja og lokahringurinn í dag var aftur á Hólmsvelli.

Aðstæður voru töluvert betri í dag en á fyrsta hring í Leirunni á föstudaginn var og skorið sýndi það.

Aron Snær Júlíusson vann karlaflokkinn í bráðabana, en hann og Axel Bóasson enduðu jafnir á þremur höggum undir pari. Sextánda holan var leikin í bráðabananum, og vann Aron með öruggu pari.

Aron Snær lék best allra á mótinu í dag, á sex undir pari vallar og tapaði ekki höggi á hringnum.

Tómas Eiríksson Hjaltested, ríkjandi stigameistari mótaraðarinnar varð þriðji á tveimur undir pari.

Perla vann kvennaflokkinn

Spennan var mikil framan af í kvennaflokki en þær Perla Sól Sigurbrandsdóttir úr GR og Fjóla Margrét Viðarsdóttir úr Golfklúbbi Suðunesja voru jafnar fyrir hring dagsins. Þær voru enn jafnar þegar hringurinn var hálfnaður en þá skildu leiðir.

Perla lék seinni níu á höggi undir pari en Fjóla Margrét á fjórum yfir parinu. Perla fagnaði því sigri á fjórum yfir pari í heildina en Fjóla Margrét á níu yfir pari.

Eva Kristinsdóttir átti góðan hring í dag og náði þriðja sætinu með hring upp á 73 högg.