Aldrei unnið atvinnumannamót en er efstur fyrir lokahringinn á PGA

Smalley er ekki sá þekktasti í bransanum og hefur aldrei unnið mót á PGA-mótaröðinni á sínum ferli. Hann er tíundi kylfingurinn frá 1995 sem er með forystu eftir þrjá hringi á risamóti þrátt fyrir að hafa aldrei unnið PGA-mót á ferlinum. 

Sá eini sem hélt út og vann risamót var Suður-Afríkumaðurinn Louis Oosthuizen sem vann Opna breska meistaramótið 2010. John Daly er sá síðasti sem vann PGA-meistaramótið (1991) án þess að vera með sigur á PGA-móti á ferilskránni.

PGA-meistaramótið er eina risamótið sem Smalley hefur keppt á. Hann lenti í 23. sæti 2023, komst ekki í gegnum niðurskurðinn 2024 og endaði í 28. sæti í fyrra.

Smalley lék þriðja hringinn í dag á tveimur höggum undir pari. Á hæla hans koma fimm kylfingar sem eru allir á samtals fjórum höggum undir pari: Nick Taylor, Matthias Schmid, Aaron Rai, Jon Rahm og Ludvig Åberg. Kanadamaðurinn Taylor og Þjóðverjinn Schmid léku þriðja hringinn á fimm höggum undir pari.

Rory McIlroy, sem vann Masters í síðasta mánuði, lék á fjórum höggum undir pari í dag og er á samtals þremur höggum undir pari. Sömu sögu er að segja af Xander Schauffele, Patrick Reed og Maverick McNealy.

Bein útsending frá lokadegi PGA-meistaramótsins hefst klukkan 12:00 á morgun.