Vildi fara heim: Seldur aftur til Þróttar eftir að­eins fimm mánuði í FH

Frá þessu greinir FH í færslu á samfélagsmiðlum í kvöld en Kári hefur komið við sögu í öllum fimm leikjum FH í Bestu deildinni hingað til. Hann vildi hins vegar halda aftur heim í Laugardalinn eftir stutta veru í Kaplakrika. 

„Kári kom að máli við okkur fyrir ekki svo löngu síðan og lýsti yfir vilja að fara aftur heim. Þróttarar voru tilbúnir að borga uppsett verð fyrir hann og í framhaldinu ákváðum við að leyfa leikmanninum að fara. Í þeirri uppbyggingu sem við erum í er mikilvægt að leikmennirnir okkar séu tilbúnir að leggja allt í verkefnið og þegar sú er ekki raunin þá er betra að leikmaðurinn finni sér nýtt lið," segir Davíð Þór Viðarsson, yfirmaður knattspyrnumála hjá FH í færslu félagsins á samfélagsmiðlum.

Kári er 21 árs gamall og á að baki 66 leiki í næstefstu deild fyrir Þrótt Reykjavík þar sem að hann skoraði sautján mörk. Hann mun án efa styrkja uppeldisfélag sitt sem hefur sett stefnuna upp í Bestu deildina á yfirstandandi tímabili.