Enn meiri breytingar: Yfir­menn klónaðir með gervi­greind

Stundum til að besta verkefni en stundum einfaldlega til að geta sinnt betur meira áríðandi störfum. Sem þýðir þá að gervigreindin sér um rútínuverkefnin eða þau leiðinlegri, á meðan stjórnandinn sjálfur getur einbeitt sér að verkefnum sem teljast stærri, skemmtilegri eða mikilvægari.

Þetta er þó að hafa bein áhrif á starfsmenn og ekki ólíklegt að þau áhrif eigi eftir að sýna sig á mörgum vinnustöðum næstu árin. Því samkvæmt rannsókn vísindamanna við tölvunarfræðideild Carnegie Mellon-háskólans mun atvinnulífið líklegast fara að klóna yfirmenn með gervigreind.

Það sem þetta þýðir er að stjórnendur munu nýta sér stafræna staðgengla. Þessir stafrænu staðgenglar eru þá gervigreind sem er þjálfuð í samskiptum og ákvarðanatöku tengt viðkomandi stjórnanda.

Klónaði yfirmaðurinn yfirtekur þá markvissar þessi leiðinlegu, minni eða ópersónulegu verkefni, svo stjórnandinn sjálfur geti einbeitt sér að hinum verkefnunum sem áður voru nefnd.

Fyrir starfsfólk getur þetta þýtt svakalega breytingu.

Sömuleiðis fyrir þróun vinnustaðamenningar.

Eða hvar fólk velur að starfa.

Því niðurstöður í fyrrnefndri rannsókn sýna að starfsfólk metur stjórnendur oft meira fyrir tilfinningagreind þeirra og persónulegan skilning, frekar en hæfni þeirra til að leysa verkefni eða sérfræðiþekkingu.

Það sem vekur samt athygli í þessu er ekki aðeins sú staðreynd að stjórnun er á endanum mjög mannleg þegar á reynir, heldur það að mjög líklega eru klónaðir gervigreindaryfirmenn líklegir til að breyta verulega því hlutverki sem eftir stendur hjá stjórnendum.

Um niðurstöðu rannsóknarinnar segir einn forsvarsmanna hennar til dæmis: 

„Ég tel að það sem við munum sjá sé ekki að yfirmenn hverfi, heldur að hlutverk þeirra breytist.“

Dæmi:

Yfirmannsklóni getur séð um verkefni eins og að greina tölvupósta, skilaboð og fundargögn og lært hvernig stjórnandinn beitir sér í samskiptum eða tekur ákvarðanir.

Yfirmannsklóni getur líka tekið þátt í fundum, svarað spurningum starfsmanna, samið skýrslur, greint fjárhagsáætlanir og sinnt ýmsum öðrum verkefnum.

Ef stjórnandi kemst ekki á fund getur klóninn mætt í hans stað.

Til að setja ofangreinda lýsingu í samhengi við önnur mál í umræðunni má til dæmis nefna gervigreindina sem þátttakanda í skrifum frambjóðenda eða fræðimanna. 

Eitthvað sem nokkuð hefur verið fjallað um þar sem sitt sýnist hverjum.

Breytingin miðað við þessa klónun þýðir þá að aðkoma gervigreindarinnar eykst ef eitthvað er, til dæmis í skrifum frambjóðenda. En þá sem viðurkenndur klóni stjórnmálamannsins; sumsé, gervigreind sem hefur verið þjálfuð sérstaklega til að skrifa og beita sér í samskiptum eins og viðkomandi stjórnmálamaður.

Fyrir atvinnulíf snýst þetta þó um mun meira þegar betur er að gáð. Því klónun yfirmanna mun mjög líklega hafa mikil áhrif á samskipti og menningu fólks almennt á vinnustöðum.

Niðurstöður rannsóknarinnar voru kynntar sérstaklega á CHI 2026-ráðstefnunni sem haldin var í Barcelona í apríl, en CHI-ráðstefnan (Conference on Human Factors in Computing Systems) er árleg vísindaráðstefna sem telst ein sú virtasta í heimi samskipta tækni og manna. Lesa má nánar um niðurstöður hennar hér , en þar kemur meðal annars fram sú tilgáta vísindamanna að án efa verði sú þróun sýnileg á næstu árum að vinnumarkaðurinn muni skiptast svolítið í tvennt;

Annars vegar vinnustaði sem munu taka þeirri þróun og tækifærum sem klónunin felur í sér fagnandi.

Á meðan munu aðrir vinnustaðir sporna við þróuninni og leggja áherslu á mannlega nálgun í hvívetna.

Spurningin sem aðeins framtíðin getur á endanum svarað er hins vegar: 

Hvor leiðin er betri?