„Þetta er á­kveðin skák“

Aron Rafn varði 19 skot í leiknum og var með 47,5% markvörslu sem hjálpaði liði hans feykilega mikið við það að landa fimm marka sigri gegn erkióvininum. Lokatölur 27-22 á Ásvöllum.

„Við náðum að standa vörnina í 60 mínútur og mér fannst það eiginlega vera munurinn á leikjunum og við vorum að sjálfsögðu að nýta dauðafærin töluvert betur. Ég veit ekki hvað Jón Þórarinn [markvörður FH] var með í síðasta leik, en hann var með eitthvað í kringum 45% markvörslu sem var munurinn í þeim leik. Það var munurinn á þessum tveimur leikjum.“

Það var frábær mæting á þennan leik sem hófst með einnar mínútu þögn til heiðurs Björgvins Halldórssonar. Eftir það voru lætin gríðarleg allt til leiks loka, en þrátt fyrir fimm marka sigur var leikurinn jafn og spennandi meiri hluta leiksins.

„Það var ógeðslega gaman að spila þennan leik. Mér fannst ég ekki vera í takt í leiknum í fyrri hálfleik þó að ég var með níu bolta, en ég fann að þetta var að koma og bara naut mín. Þetta er úrslitakeppnin og það er ógeðslega gaman að spila fyrir fullu húsi og Haukar-FH og allar klisjurnar í bókinni. Ef maður getur ekki notið sín í svona leikjum þá veit maður ekki hvar maður ætti að vera í handbolta.“

Næsti leikur einvígisins er á þriðjudaginn í Kaplakrika.

„Við verðum bara að halda þessari ákefð áfram, það er stutt á milli leikja og þetta er ákveðin skák. FH-inganir munu koma alveg brjálaðir í þann leik og við verðum líka að vera klárir. Við vitum að við getum ekkert gefið eftir. Þurfum að mæta þá eins og við mættum í dag,“ sagði Aron Rafn að lokum.