Halda á­fram að deila: Van Veen er al­veg sama hvað Littler finnst

Van Veen og Littler mættust í átta manna úrslitum á keppniskvöldinu í Manchester á fimmtudaginn. Eftir að Van Veen mistókst að tryggja sér sigurinn í oddalegg fagnaði Littler fyrir framan áhorfendur í salnum.

Littler mistókst sömuleiðis að klára leikinn í næstu heimsókn sinni og þóttist svo grenja í bendingu til áhorfenda. Van Veen lét látbragð Littlers ekki á sig fá, hitti í tvöfaldan sex og tryggði sér sigurinn. Van Veen og Littler tókust svo stuttlega í hendur að leik loknum.

Í kjölfarið gagnrýndi Van Veen framkomu Littlers og sagði hann hafa sýnt sér dónaskap.

„Hann klikkaði og svo kláraði ég og hann er líklega brjálaður. Þetta er pílukast og þetta er mitt sjónarhorn. Hans sjónarhorn er líklega öðruvísi, en svona er þetta,“ sagði Van Veen.

Littler svaraði ummælum Van Veen með hlæjandi brosköllum í sögu á Instagram og birti einnig mynd sem sýndi PDC-titlana sem hann hefur unnið á síðustu tveimur árum. Van Veen brást við útspili Littlers í samtali við Viaplay.

„Við höfum ekki talað saman. Ég sá viðbrögð hans á samfélagsmiðlum. Honum fannst þetta fyndið. Ég býst ekki við að við verðum vinsamlegum nótum á næstunni,“ sagði Van Veen.

„Ég er hérna fyrir sjálfan mig. Hann er stórkostlegur pílukastari, efstur á heimslistanum og það sem hann gerir fyrir íþróttina er frábært en mér er nokk sama hvað honum finnst um mig.“

Littler og Van Veen mættust í úrslitaleik heimsmeistaramótsins í upphafi ársins. Þar hafði Littler betur, 7-1, og vann heimsmeistaratitilinn annað árið í röð.

Gerwyn Price hrósaði sigri í Manchester á fimmtudaginn, á níunda keppniskvöldi úrvalsdeildarinnar í pílukasti. Næsta keppni fer fram í Brighton á fimmtudaginn kemur. Littler er efstur í úrvalsdeildinni með 21 stig en Van Veen er í 5. sæti með tólf stig.