„Mér fannst við flatar og lé­legar“

„Mér fannst þetta ekki einu sinni fínn fyrri hálfleikur. Mér fannst við flatar og lélegar,“ sagði Emil Barja, þjálfari Hauka, eftir nauman sigur í kvöld.

Stjörnukonur settu 40 stig í þriðja leikhluta og settu alvöru spennu í leikinn fyrir fjórða leikhluta.

„Þær fara að stíga aðeins meira upp og fóru að setja skot. Þær voru búnar að vera með núll þrista í fyrri hálfleik og fóru bara að setja skotin og voru miklu grimmari.“

Deildarmeistararnir bjuggust kannski ekki við því að fá á sig 40 stig í einum leikhluta og var Emil ekki sáttur með varnarleik liðsins.

„Hann var ömurlegur. Það er ótrúlega skrítið hvernig við komum til leiks, rosalega flatt og misstum mennina framhjá okkur mjög einfaldlega. Hrós á Stjörnuliðið þær voru frábærar.“

Emil telur liðið þurfa meiri baráttu í fráköstunum og betri varnarleik fyrir næstu viðureign liðanna.

„Betri varnarleik og miklu meiri baráttu í fráköstunum. Þær tóku tuttugu og eitthvað sóknarfráköst á okkur. Ég veit ekki hvort það hafi verið vanmat eða eitthvað annað en þetta var ekki nógu gott og við getum bætt okkur á mörgum stöðum.“

„Ég hef alveg fulla trú á að þetta muni koma og við munum bæta okkur“