Guð­rún skoraði sjálfs­mark en fagnaði stór­sigri gegn gömlu fé­lögunum

Guðrún varð Svíþjóðarmeistari þrisvar sinnum með Rosengard en kvaddi félagið eftir síðasta tímabil og fór til Braga í Portúgal. Hlutirnir gengu ekki upp þar og Guðrún sneri snöggt aftur til Svíþjóðar en þá til Hammarby.

Hammarby og Rosengard mættust svo í fyrstu umferð sænsku deildarinnar í dag og Guðrún var í vinstri bakverðinum hjá Hammarby gegn gömlu félögunum.

Hammarby var með algjöra yfirburði frá upphafi leiks og var komið með 3-0 forystu eftir aðeins sautján mínútur. 

Svo dró ekki aftur til tíðinda fyrr en um miðjan seinni hálfleik þegar Guðrún reyndi að komast inn í sendingu fyrir markið en setti boltann óvart í eigið net.

Sjálfsmarkið kom ekki að mikilli sök og Hammarby fagnaði 3-1 sigri í fyrstu umferðinni.