Besta sætið: Vonandi gefst fólk ekki upp í Þor­láks­höfn

Henry Birgir Gunnarsson, Eiríkur Stefán Ásgeirsson og Aron Guðmundsson sáu um að sigla þætti dagsins í höfn.

Stóru tíðindi dagsins eru þau að landsliðsmaðurinn í handbolta, Janús Daði Smárason, skrifaði í dag undir þriggja ára samning við stórlið Barcelona. Hann mun spila þar ásamt Viktori Gísla Hallgrímssyni. Vissulega eitt versta geymda leyndarmál handboltans en alltaf risastórt er Íslendingur semur við þetta spænska stórlið.

Arnar Pétursson, þjálfari kvennalandsliðsins í handbolta, kynnti svo hópinn fyrir komandi leiki í undankeppni EM. Þó svo stelpurnar okkar séu í neðsta sæti riðilsins eru þær enn með örlögin í eigin höndum.

Lokaumferð Bónus-deildar karla fer svo fram í kvöld. Þar stendur Þór frá Þorlákshöfn afar illa að vígi og er ansi líklegt að liðið falli í kvöld. Fimm árum eftir að liðið varð Íslandsmeistari. Fari svo hafa margir áhyggjur af því að það muni fjara undan frábæru starfi deildarinnar.

Svo hófst úrslitakeppnin í Olís-deild karla með látum í gær. Framlengt í báðum leikjum. Verður áhugavert að sjá hvað gerist í leikjunum tveimur í kvöld.

Besta sætið er aðgengilegt á öllum helstu hlaðvarpsveitum og kemur út alla virka daga.