Bankarnir byrjaðir að hækka vexti

Sparisjóðurinn Indó hefur ákveðið að halda vöxtum sínum óbreyttum en hann lánar ekki fyrir húsnæði. Landsbankinn og Auður hafa ekki enn tilkynnt vaxtabreytingar.

Hjá Arion banka munu óverðtryggðir breytilegir íbúðalánavextir hækka um 0,25 prósentustig og verða 9,19%. Á sama tíma hækka óverðtryggðir íbúðalánavextir fastir til þriggja ára um 0,15 prósentustig og verða 8,25%.

Verðtryggðir breytilegir íbúðalánavextir lækka um 0,10 prósentustig hjá Arion og verða 4,49%. Verðtryggðir íbúðalánavextir fastir til þriggja ára lækka einnig um 0,10 prósentustig og verða 4,64%.

Hjá Íslandsbanka hækka breytilegir vextir á óverðtryggðum húsnæðislánum um 0,25 prósentustig. Breytilegir vextir fyrstu kaupalána hækka sömuleiðis um 0,25 prósentustig. Ekki eru boðaðar breytingar á vöxtum verðtryggðra lána. Greint er frá vaxtabreytingunum á vefsíðum bankanna. 

Önnur lán einnig dýrari

Kjörvextir bílalána hjá Arion munu hækka um 0,25 prósentustig og verða 10,75%. Þá fara yfirdráttarvextir og veltuvextir kreditkorta einnig upp um 0,25 prósentur og verða 15,25%.

Hjá Íslandsbanka hækka óverðtryggðir kjörvextir Ergo á bílalánum og bílasamningum um 0,25 prósentustig. Vextir á yfirdráttarlánum og greiðslukortum hækka sömuleiðis um 0,25 prósentustig.

Innlánsvextir hækka

Stýrivaxtahækkun Seðlabankans mun einnig hafa áhrif á sparnað einstaklinga og fyrirtækja.

Vextir veltureikninga hjá Arion haldast óbreyttir en vextir annarra óverðtryggðra innlánsreikninga hækka um allt að 0,35 prósentustig. Vextir verðtryggðra reikninga munu hins vegar lækka um allt að 0,10 prósentustig.

Hjá Íslandsbanka munu vextir á óverðtryggðum sparnaðarreikningum hækka um allt að 0,25 prósentustig. Vextir á veltureikningum fara upp um 0,15 prósentustig.

Vaxtabreytingarnar hjá Arion banka taka gildi 26. mars en 23. mars hjá Íslandsbanka.

Fréttin hefur verið uppfærð með vaxtaákvörðun Íslandsbanka.