„Það var í raun ekkert merki­legt, ég var ekkert að æsa mig“

Njarðvík byrjaði leikinn betur og skoraði ellefu stig án svars á fyrstu mínútum fyrsta leikhluta. Emil Barja, þjálfari Hauka, tók þá leikhlé sem reyndist dýrmætt, því eftir það sneru Haukar leiknum sér í vil og náðu yfirhöndinni.

„Það var í raun ekkert merkilegt, ég var ekkert að æsa mig í leikhlénu. Við vorum að fá ágætis skot en þau voru ekki að detta. Þetta var aðallega smá núllstilling þar sem ég var óánægður með varnarleikinn í byrjun. Þetta var bara svona byrjum þetta og já við byrjuðum þá.“

Emil var ánægður með sóknarleik liðsins og fannst leikmenn hafa unnið vel saman.

„Frammistaða liðsins var virkilega góð. Sóknarleikurinn var rosalega góður og við vorum að finna hvar þær voru að gera mistök og við gerðum það vel. Við vorum að rúlla vel og það var mjög góð samvinna í sókninni.“

Hvað getur liðið tekið úr þessum leik?

„Ég vona að við náum að halda þessari baráttu áfram. Við erum lið sem hefur kannski ekki verið að taka mikið af fráköstum þannig það er frábært að vinna frákastabaráttuna. Við þurfum að gefa ennþá meira í og ég held að við getum gefið ennþá meira í.“