Úr barnaskemmtunum á klúbbinn

Allir sem hafa séð sjónvarpsþættina Latabæ þekkja grípandi slagarann „Bing Bang“ sem Solla stirða syngur í lok hvers þáttar. Tónskáldið Máni Svavarsson samdi lagið upprunalega 1999, það kom svo út sem smáskífa árið 2006 og hefur síðan verið tekið á öllum barnaskemmtunum á vegum Latabæjar.

Bing bang dingalingaling/Fyndin orð sem fá mig til að hreyfast/ Bing bang dingalingaling/þessi orð þau þýða hvað sem er“

Á miðnætti kom lagið út í glænýjum klúbbabúningi á vegum pródúsentsins Önnu Bíbíar sem fékk sterkan liðsauka með sér. Anna Bíbí Wium Axelsdóttir er 21 árs gamall Grafarvogsbúi sem vinnur í sértækri frístnud, Sunnudagaskólanum í Grafarvogskirkju og á tækniborðinu hjá Improv Ísland. Samhliða þessu eyðir hún frítíma sínum í að „músíkast“ eins og hún orðar það sjálf.

„Sérstakt áhugamál hjá mér er að gera „remix“ af alls konar lögum. Fyrir þremur árum gaf ég út remix af Kisutangó og fékk það einhverja smá athygli. Í haust datt mér svo í hug að „remixa“ eitthvað Latarbæjarlag en þættirnir voru í miklu uppáhaldi þegar ég var barn,“ segir Anna Bíbí um það hvernig lagið kom til.

„Síðan leið smá tími þar til Unnur poppaði upp á Tik Tok hjá mér þar sem hún sýndi gamla klippu af sér skemmta sem Solla stirða. Þá kom upp sú hugmynd að hafa samband við hana og bjóða henni að vera með á laginu,“ bætir hún við.

„Mér finnst svo gaman hvað Latibær lifir góðu lífi. Ég var ekki nema sautján ára þegar ég tók við hlutverki Sollu stirðu og fékk að skemmta yfir fimm hundruð sinnum um allan heim, í þremur heimsálfum,“ segir Unnur Eggerts.

„Það eru komin ansi mörg ár síðan ég setti bleiku kolluna á mig en mér mun alltaf þykja vænt um hana. Þannig þegar Anna heyrði í mér með að gera „djamm-remix“ af „Bing Bang,“ sem kom nota bene fyrst út áður en hún fæddist, fannst mér bara frábært að stökkva á það. Ég hef sungið „Bing Bang“ yfir fimm hundruð sinnum á barnaskemmtunum, er ekki bara komið að því að syngja það á klúbbunum næst?“ segir hún.

Anna segir samstarfið hafa gengið vel og Unnur komið með góða orku inn í ferlið.

„Mér finnst klikkað að Unnur hafi verið til í að hoppa á þetta lag með mér og ég er gríðarlega þakklát. Unnur er algjör stemningskona og kom með geggjaða orku inn í allt ferlið! Við kíktum svo til Mána Svavars sem samdi lagið og leyfðum honum að heyra remixið. Það var æðislegt og algjör heiður,“ segir Anna Bíbí.