Miklar hækkanir í lágvöruverðsverslunum í byrjun árs

Borin voru saman verð þann 17. janúar síðastliðinn í Prís, Bónus og Krónunni og mátuð við verð á sömu vörum þann 10. desember síðastliðinn. Verð á vörum frá Ölgerðinni hafði hækkað um 3-4 prósent að meðaltali í Bónus, Krónunni og Prís.

Verð á vörum frá Coca-Cola á Íslandi hafði ekki hækkað í Prís en hækkaði um rúmlega 4 prósent í Krónunni og rúmlega 5 prósent í Bónus. Vörur frá Myllunni hækkuðu í verði um hálft annað prósent í Bónus að meðaltali, um 3 prósent í Krónunni en ekki í Prís. Eru þetta veigamestu hækkanirnar frá byrjun ársins.

Vörur frá Kaffitár hækkuðu um rúmlega 5 prósent í Bónus. Tekið er fram að sumar birgjahækkanir komi inn á ólíkum tímapunktum eftir verslunum. Til dæmis höfðu vörur Kaffitár hækkað í verði þann 20. janúar í Krónunni um svipaða upphæð, en það var þremur dögum eftir verðkönnunina. Poki af Morgundögg möluðu kaffi kostar nú 1.349kr í Bónus og 1.350kr í Krónunni, en kostaði í ársbyrjun 1.279kr í Bónus og 1.280kr í Krónunni.

Bónus og Krónan byrji árshækkunina snemma

Hækkun á matvöruvísitölu Bónus og Krónunnar milli 10. desember og 17. janúar nemur 0,47 prósentum, sem gera 4,6 prósent á ársgrundvelli – hærra en árshækkunin í verslununum tveimur, sem nam 3,7 prósent í Krónunni og 4,2 prósent í Bónus. (Hækkun á ársgrundvelli segir hversu mikil hækkunin væri ef hún ætti sér stað alla mánuði ársins.)

Í Prís breyttust verð lítið – á ársgrundvelli hækkaði verðlag þar um 0,8 prósent. Undanfarið ár hefur verðlag þar hins vegar hækkað meira, eða um 5,7 prósent.

Prís langódýrast en Bónus og Krónan á krónumun

Þá kemur fram í verðlagseftirliti ASÍ að iðulega sé krónumunur á verði Bónus og Krónunnar, nú sem fyrr. Í 953 verðsamanburðum af 1.091 var Krónan einni krónu dýrari en Bónus, eða í 87 prósent tilfella.

Bónus var að meðaltali 4,7 prósent dýrara en Prís þegar 474 vörur eru skoðaðar sem finna mátti í báðum verslunum. Krónan var 6,0 prósent dýrari en Prís í samanburði á 601 vöru og 0,6 prósent dýrari en Bónus í samanburði á 1.091 vöru.