Sjáðu mörkin úr Meistara­deildinni: Tvenna Jesus, ó­vænt töp, veisla í Madríd og lang­þráður sigur

Bodö/Glimt - Man. City 3-1

Manchester City tapaði mjög óvænt gegn norska liðinu Bodö/Glimt.

Kasper Høgh kom heimamönnum yfir með marki á 22. mínútu og bætti öðru marki við aðeins tveimur mínútum síðar.

Ensku gestirnir þurftu því að finna leiðir til að snúa taflinu við í seinni hálfleik, en ekki batnaði staðan fyrir liðið þegar Jens Petter Hauge kom heimamönnum í 3-0 með stórglæsilegu marki á 58. mínútu.

Rayan Cherki minnkaði hins vegar muninn fyrir City tveimur mínútum síðar, en aðeins tveimur mínútum eftir það nældi Rodri sér í sitt annað gula spjald á stuttum tíma og þar með rautt.

FC Kaupmannahöfn - Napoli 1-1

Jafntefli varð niðurstaðan þegar Ítalíumeistararnir heimsóttu dönsku meistarana.

Scott McTominay kom Napoli yfir í fyrri hálfleik en Jordan Larsson jafnaði metin í seinni hálfleik eftir, þrátt fyrir að FCK hefði aðeins tíu menn inni á vellinum á þeim tíma.

Viktor Bjarki Daðason var í byrjunarliði FCK en fór af velli á 36. mínútu þegar Thomas Delaney fékk rautt spjald.

Inter - Arsenal 1-3

Arsenal hélt sigurgöngu sinni áfram og hefur unnið sjö fyrstu leikina í keppninni.

Brasilíumaðurinn Gabriel Jesus minnti á sig með tveimur mörkum en hann er kominn sterkur inn í liðið eftir meiðsli.

Petar Sucic jafnaði metin á 18. mínútu en Arsenal var 2-1 yfir í hálfleik.

Viktor Gyökeres kom inn á völlinn sem varamaður fyrir Gabriel Jesus og innisiglaði sigurinn með þriðja markinu sex mínútum fyrir leikslok eftir sendingu frá Bukayo Saka.

Olympiacos - Bayer Leverkusen 2-0

Olympiacos lagði Leverkusen með tveimur mörkum gegn engu. Costinha kom heimamönnum yfir eftir aðeins tvær mínútur og Mehdi Taremi tvöfaldaði forystuna rétt fyrir hálfleik.

Real Madrid - AS Monaco 6-1

Kylian Mbappé skoraði tvö fyrstu mörkin á fyrstu 26 mínútum leiksins en staðan var 2-0 í hálfleik.

Franco Mastantuono kom Real í 3-0 á 51. mínútu eftir sendingu frá Vinicius Junior en fjórða markið var sjálfsmark fjórum mínútum síðar.

Vinicius Junior kom Real síðan í 5-0 á 63. mínútu en Jordan Teze minnkaði muninn.

Sjötta og síðasta markið skoraði Jude Bellingham eftir sendingu frá Federico Valverde á 80. mínútu.

Sporting - PSG 2-1

Evrópumeistarar Paris Saint-Germain töpuðu 2-1 á útivelli á móti portúgalska félaginu Sporting. Luis Suárez skoraði bæði mörk Sporting en Khvicha Kvaratskhelia jafnaði metin á 79. mínútu. Sigurmarkið kom á lokamínútu leiksins.

Tottenham - Dortmund 2-0

Cristian Romero og Dominic Solanke skoruðu mörk Tottenham í 2-0 sigri á Borussia Dortmund en þetta var langþráður sigur fyrir knattspyrnustjórann Thomas Frank. Dortmund var manni færri frá 24. mínútu þegar Daniel Svensson fékk rautt spjald.

Villareal - Ajax 1-2

Tani Oluwaseyi kom heimamönnum yfir í upphafi seinni hálfleiks en mörk frá Oscar Gloukh og Oliver Edvardsen tryggðu gestunum sigurinn.

Kairat - Club Brugge 4-1

Gestirnir frá Belgíu tóku fjögurra marka forystu áður en heimamenn í Kasakstan minnkuðu muninn undir lok leiks.