„Finnst ekki ó­lík­legt að hann geri það“

„Þetta er akkúrat eins og við vildum byrja þetta. Að ná í heildsteypta frammistöðu og góðan sigur. Það gefur okkur að sjálfsögðu mikið. Ég er mjög ánægður og líka allir hinir,“ sagði Orri Freyr um fyrsta leikinn við Ítali þegar hann var tekinn tali fyrir æfingu landsliðsins í gær.

Orri Freyr spilaði fyrri hálfleik í leiknum en Bjarki Már Elísson tók við keflinu í þeim síðari í vinstra horninu. Hann segir það ekki hafa legið fyrir að þeir myndu skipta með sér hálfleikjum fyrir fram en eðlilegt sé að dreifa álaginu.

„Ég bara hreinlega veit það ekki. Ég held það sé fínt að þetta rúlli aðeins. Það er strax aftur leikur á morgun, annar eftir hann og vonandi ennþá fleiri. Mér finnst þetta bara eðlilegt, að rúlla vel á liðinu eins og við gerðum í flestum stöðum í þessum leik. Ég veit ekki hvort það var ákveðið fyrir fram eða ekki,“ segir Orri.

Fylgdust vel með andstæðingunum

Strákarnir slökuðu þá á eftir leik og kíktu á leik Pólverja við Ungverja sem fram fór í höllinni eftir leik Íslands. Ungverjar unnu öruggan sigur í leiknum.

„Þetta er bara venjulegt, maður fær sér að borða og slakar á. Svo gerum við eitthvað saman strákarnir. Í gær fylgdumst aðeins með leiknum hjá Ungverjum og Pólverjum.“

Aðspurður um hvað hann hafi helst tekið eftir í leiknum segir hann:

„Pólverjarnir voru aðeins í 7 á móti 6. Þeir eru töluvert frábrugðnir Ítölunum, þeir eru með stærri og sterkari leikmenn. Þeir eru með sterkan línumann og voru að leita svolítið að honum. Þeir geta skotið frá níu metrum og eru með fína leikmenn einn á einn.“

Þekkir til þjálfarans

Orri er leikmaður Porto í Portúgal og hefur marga baráttuna háð við lið Benfica. Því er stýrt af Jota Gonzalez, spænskum þjálfara pólska liðsins, sem beitir því óspart að spila með sjö leikmenn gegn sex í sókn.

„Hann hefur mikið með Benfica í 7 á 6 og maður sér það sama með pólska liðið. Mér finnst ekki ólíklegt að hann geri það á móti okkur. Á miðað við það sem ég þekki af honum má gera ráð fyrir því,“ segir Orri og búast megi við töluvert fráburgðnu verkefni á við Ítalíu sem spilaði villtan leik við Ísland.

„Mér þykir ólíklegt að Pólverjarnir fari í 3-3 og sömuleiðis ólíklegt að þeir spili með sex leikmenn fyrir utan. Við erum byrjaðir að skoða þá og æfing þar sem við förum yfir ákveðna þætti og annan fund í kvöld. Við ljúkum undirbúningi þannig og mætum klárir til leiks,“ segir Orri.

Viðtalið má sjá í spilaranum.

Leikur Íslands við Pólland hefst klukkan 17:00 og verður lýst beint hér á Vísi.