Laus við tvo endajaxla og skrúfu úr hnénu

Það er í það minnsta enginn uppgjafartónn í Söru Sigmundsdóttur þrátt fyrir erfiðleika síðustu ára og íslenska CrossFit-konan er spennt fyrir komandi keppnisári sem eru mjög jákvæðar fréttir.

Sara gerði upp síðasta ár með myndasyrpu og nokkrum lofandi orðum á samfélagsmiðlum.

„Tvö ný lönd, fimm keppnir, einn stór ótti yfirstiginn, fullt af nýju fólki, tveimur endajaxlum færra, engin skrúfa lengur í hnénu, byrjuð aftur í námi og síðast en ekki síst fullt af nýjum stofnfrumum í hnénu,“ skrifaði Sara.

„Nauðsynleg klipping, óvæntar breytingar,“ bætti hún við.

„Þakklát fyrir hverja lexíu, hverja baráttu, hverja manneskju og hvert tækifæri. Takk, 2025. Ég er spennt að sjá hvað 2026 hefur upp á að bjóða,“ skrifaði Sara.

„Skálum fyrir því að læra af fortíðinni, setja ný áform/markmið fyrir þetta ár, treysta ferlinu, halda í agann og mæta fyrir sjálfa/n þig á hverjum einasta degi á öllum sviðum,“ skrifaði Sara nokkrum dögum fyrr eða við áramótin.

Það eru fleiri að sjá hvort Söru takist að komast á sína fyrstu heimsleika í sex ár. Þangað er þó löng og erfið leið þar sem samkeppnin er mikil.

Líkt og kemur vel fram í athugasemdunum við færsluna þá á Suðurnesjamærin aðdáendur út um allan heim og takist henni að fullkomna endurkomuna með því að tryggja sig inn á heimsleikana þá myndu margir fagna. Ekki bara á Íslandi heldur út um allan heim.