Varar í­þrótta­fólk við á­kveðinni tegund á­fengis

Margir leyfa sér aðeins meira áfengi yfir jólin. Á sama tíma eru nýársheitin skipulögð, þar sem æfingar eru ofarlega á lista hjá mörgum. En hvaða áhrif hefur áfengi í raun á æfingaformið?

Norska ríkisútvarpið lagði nokkrar af algengustu spurningunum fyrir Göran Paulsen, prófessor við NIH, grindahlauparann Andreu Rooth og skíðagöngumanninn Emil Iversen.

Sú fyrsta af þeim var hvort að íþróttafólk, og aðrir, tapi niður þoli við það eitt að drekka áfengi.

Segjum að þú sért einstaklingur sem hleypur þrisvar til fjórum sinnum í viku. Auk þess drekkur þú nokkur vínglös nokkrum sinnum í viku. Versnar þolið þá?

„Sennilega ekki. Það er ekki vandamál ef áfengisneyslan er mjög lítil,“ sagði Göran Paulsen prófessor.

Hann telur að áfengi hafi engin bein jákvæð áhrif, en að það geti verið einstaklingsmunur á því hvernig fólk bregst við. Spurningin er hversu mikils áfengis þú getur neytt áður en það hefur óheppileg áhrif.

„Fyrir suma er það kannski algjörlega vandræðalaust, en fyrir aðra getur jafnvel lítið magn haft neikvæð áhrif. Öruggast er að sleppa því ef maður vill fá hámarksárangur út úr æfingunni,“ sagði Paulsen.

Prófessorinn varaði sérstaklega við ákveðinni tegund áfengis.

„Forðastu dökkt brennivín,“ varaði prófessorinn við. „Þar er hátt etanólinnihald auk ýmissa annarra efna sem myndast í gerjunarferlinu og magna upp timburmannaáhrifin,“ sagði Paulsen.

Sumir íþróttamenn taka þá ákvörðun að sleppa því alveg að drekka áfengi. Frjálsíþróttakonan Andrea Rooth er þannig meðvituð um að hún vilji ekki taka neina áhættu.

„Aðalástæðan er sú að það eyðileggur endurheimtina. Maður finnur fyrir vanlíðan og það er líka eitthvað andlegt í því,“ sagði grindahlauparinn öflugi.

„Ég hef ekki einu sinni smakkað það! Það lítur hræðilega út,“ sagði Rooth og hlær þegar hún heyrir að dökkt brennivín sé verst.

Prófessorinn telur að bjór með tiltölulega lágu áfengisinnihaldi hafi í raun sýnt sig geta verið nokkuð góður vökvunardrykkur og sé því ekki svo slæmur.

Rauðvín er líka langt frá því að vera það versta en langt frá því að vera gott samt.

„Margir halda því fram að pólýfenól úr þrúgunum, rauði liturinn, hafi jákvæð áhrif, en það vegur ekki upp á móti neikvæðum áhrifum áfengis,“ sagði Paulsen.

Skíðagöngustjarnan Emil Iversen segist hafa alfarið hætt að drekka áfengi frá því í sumar. Hann fann að honum leið illa í líkamanum af því að drekka það.

„Ég hefði giskað á koníak og viskí sem það versta,“ sagði Iversen.

„Já, dökkt brennivín, það segir sig sjálft,“ sagði Iversen og brosir.

Það má lesa meira um þetta hér.