Þekktir vísinda­menn lögðu lag sitt við Ep­stein

Tengsl Epstein við Donald Trump Bandaríkjaforseta hafa verið á allra vörum undanfarin misseri, sérstaklega eftir að demókratar á Bandaríkjaþingi birtu aragrúa gagna, þar á meðal tugi þúsunda tölvupósta.

Úr gögnunum má þó einnig lesa að Epstein átti í samskiptum við fjölda málsmetandi karla sem virðast hafa verið mismikið inni í glæpum auðkýfingins gegn ungum stúlkum.

Epstein hafði töluverðan áhuga á vísindum og eru samskipti hann við suma heimsþekkta vísinda- og fræðimenn að finna á meðal póstanna sem voru opinberaðir.

Chomsky fékk fjármálaráðgjöf og boð um gistingu

Fáir höfðu meiri áhrif á málsvísindi á 20. öld en Noam Chomsky, bandaríski fræðimaðurinn og heiðursprófessor við MIT-háskóla. Epstein bauð honum meðal annars afnot af íbúð í New York og að heimsækja Nýju-Mexíkó „aftur“ í tölvupósti árið 2015. Epstein átti búgarð fyrir utan Santa Fe í Nýju-Mexíkó.

Áður hefur komið fram að Chomsky leitaði til Epstein um fjármál og flutti sá síðarnefndi fé fyrir hann. Þetta gerði hann jafnvel eftir að Epstein var skráður kynferðisbrotamaður eftir að hann hlaut dóm á Flórída árið 2008.

Chomsky, sem er einnig þekktur fyrir skrif sem hafa veitt róttækum vinstri mönnum innblástur í gegnum tíðina, sagði Wall Street Journal árið 2023 að samband hans við Epstein kæmi engum við. Epstein hefði verið búinn að afplána sína refsingu og væri með hreinan skjöld að lögum.

Falaðist eftir ráðum vegna ásakana um áreitni

Lawrence Krauss, kanadískur stjarneðlisfræðingur sem naut um skeið hylli fyrir vísindamiðlun í fjölmiðlum, átti einnig í miklum bréfaskriftum við Epstein en auðkýfingurinn styrkti meðal annars verkefni sem Krauss stýrði í Arizona.

Stjarneðlisfræðingurinn falaðist meðal annars eftir ráðum frá Epstein um hvernig hann ætti að bregðast við ásökunum um kynferðislega áreitni við Ríkisháskólann í Arizona.

„Brjóttu ásakanirnar niður í fáránlegar. gón. brandarar. o.s.frv.,“ skrifaði Epstein til baka, að því er kemur fram í umfjöllun tímaritsins Scientific American.

Rannsókn háskólans á Krauss leiddi meðal annars í ljós að hann hefði þuklað á konu. Hann var settur í leyfi og honum var ekki boðið að stýra áfram rannsókninni sem Epstein styrkti.

Krauss var formaður samtaka kjarnorkuvísindamanna sem eru þekktust fyrir að birta svonefnda dómsdagsklukku sem á að sýna hversu sína hversu nærri menn séu því að eyða sjálfum sér. Hann sagði af sér formennskunni eftir að ásakanirnar komu upp.