Á­gengir ferða­menn hafi sært syrgjandi Mýrdælinga

Víkurkirkja í Vík í Mýrdal hefur undanfarin ár orðið sífellt vinsælli ferðamannastaður en myndir af kirkjunni og útsýni yfir bæinn sem hægt er að sjá frá bílastæði kirkjunnar hafa gjarnan verið í mikilli dreifingu á samfélagsmiðlum. Jóhanna Magnúsdóttir sóknarprestur segir í samtali við fréttastofu að þó vinsældir kirkjunnar séu gríðarlega ánægjulegar hafi henni fylgt margar áskoranir þegar kemur að venjulegu kirkjuhaldi.

„Það er eiginlega þannig sem það byrjaði þetta umtal um þetta, hérna voru börn manns sem verið var að jarðsyngja og það varð ágangur ferðamanna þegar líkbíllinn var nýkominn og það var verið að taka myndir og svona. Þetta særir aðstandendur.“

Fjallað var um málið í Heimildinni á dögunum.

Undanfarin þrjú ár hafi björgunarsveitarmenn aðstoðað kirkjuna með því að loka afleggjaranum að kirkjunni á meðan útfarir fara fram.

„Til að það sé nokkurn veginn friður í kringum kirkjuna á meðan þessi heilaga stund fer fram. En eins og gerðist þarna um Hvítasunnuna þá kom björgunarsveitin eitthvað seint og þá kom rúta og þá var búið að sleppa ferðamönnunum út og þá bara því miður, hvað á maður að segja, þá fór þetta eiginlega bara úr böndunum, því að þeir voru að taka myndir af líkbíl, reyna að toga eitthvað í fánann sem var í hálfa stöng og svona. Þetta er bara svona leiðindaatvik.“

Dagsdaglega gangi hinsvegar vel að taka á móti ferðafólki, sett hafi verið upp skilti við kirkjuna til að biðla til ferðafólks um að sýna virðingu. Ekki sé víst hver verði næstu skref en Jóhanna segir samtal um málið verða tekið í sóknarnefnd.

„Auðvitað erum við með ákveðið verklag í sambandi við hvar við stöndum og hvað við gerum í sambandi við útfarir og ég er mjög hissa þegar ég stend í dyrunum og það er augljóslega kista inni í kirkjunni, það sést inn í kirkjuna, að einhver skuli vilja troða sér inn og fá að taka myndir. Ég er mjög geðgóð manneskja og kurteis og þykir vænt um alla en þegar einhver ætlar að reyna að troða sér framhjá mér þegar ég er búin að segja nei þá þarf maður að setja fram hendina og segja nei því miður það er ekki í boði.“