Erlent

Tóku tugi af lífi eftir að hafa fengið lausnarfé

Samúel Karl Ólason skrifar
Glæpagengi og vígahópar hafa lengi verið áhrifamiklir í norðurhluta Nígeríu og hefur hernum gengið illa að berjast gegn þeim. Myndin tengist fréttinni ekki beint.
Glæpagengi og vígahópar hafa lengi verið áhrifamiklir í norðurhluta Nígeríu og hefur hernum gengið illa að berjast gegn þeim. Myndin tengist fréttinni ekki beint. EPA/Henry Ikechukwu

Glæpamenn sem rændu 56 manns í Zamfara-héraði í Nígeríu hafa tekið að minnsta kosti 35 þeirra af lífi. Það gerðu þeir þrátt fyrir að hafa fengið greitt lausnarfé fyrir fólkið. Embættismenn segja flesta hinna látnu hafa verið unga og að þeim hafi verið „slátrað eins og búfénaði“.

Mannrán eru tíð á þessu svæði í norðanverðri Nígeríu. Glæpagengi eru sögð þéna töluvert á því að ræna fólki og krefjast peninga fyrir að sleppa því úr haldi.

Í fyrra var um 280 börnum rænt í einni árás í norðurhluta Nígeríu.

Sjá einnig: Um 280 börnum rænt í bænum Kuriga í Nígeríu

Árið 2022 voru samþykkt lög í Nígeríu sem fela í sér að hægt er að dæma fólki í að minnsta kosti fimmtán ára fangelsi fyrir að greiða glæpamönnum lausnarfé. Var markmiðið með því að reyna að draga úr mannránum en hingað til hefur enginn verið handtekinn á grunni þessara laga.

Í þessu tilfelli, samkvæmt frétt BBC, var fólkinu rænt frá þorpinu Banga í mars. Mannræningjarnir kröfðust þess í kjölfarið að fá um átta tíu þúsund krónur fyrir hvern fanga.

Háttsettur embættismaður af svæðinu sagði í samtali við BBC að eftir langar viðræður hafi lausnarfé verið greitt. Glæpamennirnir hafi sleppt sautján konum og einum ungum dreng. Hinir voru myrtir og þykir ólíklegt að líkum þeirra verði nokkurn tímann skilað.

Nígería

Mest lesið


Fleiri fréttir

Sjá meira


×

Mest lesið