UEFA frestar á­kvörðuninni og Evrópusætið enn í ó­vissu

Palace vann sér inn sæti í Evrópudeildinni er liðið fagnaði sigri í FA-bikarnum á síðasta tímabili, en það var fyrsti stóri titill félagsins í sögunni.

Allt stefndi því í það að félagið væri á leið í næst stærstu Evrópukeppnina sem í boði er. Palace er hins vegar undir sama eignarhaldi og franska liðið Lyon og félagið má því strangt til tekið ekki taka þátt í sömu keppni.

Málið er þó ekki lengur klippt og skorið. Í síðustu viku var Lyon nefnilega dæmt niður um deild vegna slæmrar fjárhagsstöðu og Palace gæti því fengið sæti í Evrópudeildinni.

Forráðamenn Lyon hafa hins vegar áfrýjað ákvörðuninni um að liðið verði dæmt niður um deild, en nái félagið þeirri áfrýjun ekki í gegn er liðið til í að gefa Evrópudeildarsætið eftir.

UEFA hefur því ákveðið að fresta ákvörðun sinni um hvort Palace fái að taka þátt í Evrópudeildinni þar til niðurstaða er komin í áfrýjunarmál Lyon. Ekki er vitað hversu langan tíma það mál mun taka.