Hættu leit eftir þrjá tíma að þeim sem féll út­byrðis úr Nor­rænu

Tilkynning barst um átta að íslenskum tíma í gærkvöldi um að maður hefði fallið útbyrðis sunnan við Noreg, milli Lindesnes og Mandal, á leið Norrænu frá Danmörku til Færeyjar. Farþegar um borð sáu atvikið og tilkynntu til áhafnarinnar sem stöðvaði skipið samstundis til að hefja leit.

Vincent Roos, yfirmaður björgunaraðgerða hjá björgunarsveitum Noregs, sagði í samtali við Kringvarp Færeyja um ellefuleytið í gær að hvorki áhöfn Norrænu né norskar björgunarsveitir, sem notuðu þyrlur, skip og leitarbáta, hefðu fundið manninn. 

Leit hefði verið hætt eftir rúmlega þrjá tíma í ljósi þess að aðstæður gæfu litla von um að maðurinn fyndist. Sagði hann málið nú vera komið á borð lögreglunnar í Kristiansand sem sæi um rannsókn þess.

Búið að bera kennsl á manninn 

Veðurskilyrði hefðu ekki verið slæm en mikill öldugangur hefði gert leitarfólki erfiðara fyrir. 

Að sögn Roos gerðu kringumstæður málsins að verkum að vonir um að finna manninn væru engar. Roos vildi þó ekki skýra nánar hvað hann ætti við með því.

Búið er að taka manntal af farþegum skipsins og Jens Meinhard Rasmussen, forstjóri Smyril Line, sagði að búið væri að bera kennsl á viðkomandi og gera fjölskyldu hans viðvart. Roos gat þó ekki tjáð sig um það hvort um karl eða konu væri að ræða. Þá gat hann ekki sagt neitt um það hvort leit myndi hefjast að nýja eða hve lengi hún myndi standa yfir.

Nor­ræna er rek­in af Smyr­il line sem er í fær­eyskri eigu og er Seyðsfjörður einn áfangastaða skipsins.