Bernardo Silva nýr fyrir­liði Manchester City

Portúgalinn Bernardo Silva tekur nú við fyrirliðabandinu. Rúben Dias, Rodri og Erling Haaland verða varafyrirliðar.

Þetta gæti verið síðasta tímabil Bernardo Silva hjá City en samningur hans rennur út næsta sumar.

Hinn þrítugi Silva kom til City frá Mónakó árið 2017. Hann hefur verið orðaður við æskufélagið sitt Benfica.

Pep gerði Kyle Walker að fyrirliða liðsins fyrir ári síðan en það endaði ekki vel, hvorki fyrir liðið né Walker sjálfan.

City átti mjög slakt tímabil á þeirra mælikvarða og vann engan titil eftir margra ára sigurgöngu.

Walker fór á endanum á láni til AC Milan í janúar. Hann er ekki í hóp City í heimsmeistarakeppni félagsliða.

Guardiola hefur verið afar duglegur að skipta um fyrirliða á síðustu árum en oftar en ekki er það komið til vegna þess að viðkomandi leikmaður hefur yfirgefið City. Silva gæti bæst í þann hóp.

Hingað til hafa leikmennirnir sjálfir kosið sér nýjan fyrirliða en eftir vonbrigðin á síðasta tímabili þá tók Pep Guardiola þá ákvörðun að velja sjálfur fyrirliðann í þetta skiptið.