Drápu tugi sem biðu þess að fá mat

Þetta hefur breska ríkisútvarpið eftir björgunarsveitarmönnum og vitnum. Borgaraþjónustan á Gasa staðfestir að hermenn Ísraelshers hafi gert skotárás á stóran hóp fólks sem beið eftir að fá matvæli við hjálparsvæðið.

Ísraelsher hefur enn ekkert staðfest í tengslum við árásina. Í yfirlýsingu frá hernum segir málið sé í skoðun. 

Hermennirnir hófu að sögn vitna að skjóta á svæði í austurhluta Khan Younis þar sem fjöldi fólks beið í von um að fá afhent hveiti frá samtökunum World Food Programme. Að auki var tveimur eldflaugum skotið á hópinn og skoti hleypt af skriðdreka úr um hálfs kílómetra fjarlægð, samkvæmt upplýsingum frá blaðamanni BBC á svæðinu. 

Árásin er ein af mörgum, nærri daglegum, skotárásum Ísraelshers nærri starfsstöðvum hjálparsamtaka, að því er kemur fram í frétt BBC.

Yfirfullt er á Nasser sjúkrahúsinu, aðalheilbrigðisstofnuninni á svæðinu, vegna árásarinnar. Margir liggja særðir á gólfum sjúkrahússins meðan heilbrigðisstarfsmenn hlúa að þeim. 

Volker Turk mannréttindafulltrúi Sameinuðu þjóðanna sagði í yfirlýsingu í gær að Ísraelsmenn væru að vopnavæða matvæli og gerði ákall eftir rannsókn á skotárásum hersins undanfarna daga. 

„Hernaðaraðgerðir Ísraels eru að valda Palestínumönnum á Gasa hræðilegri þjáningu fram úr öllu hófi,“ sagði hann í yfirlýsingu.