Karl­maður lést eftir fall á úr­slita­leik Þjóða­deildarinnar

Úrslitaleikur Þjóðadeildar karla í knattspyrnu fór fram á sunnudag. Þar hafði Portúgal betur gegn Spáni eftir vítaspyrnukeppni. Leikið var í München og var maðurinn sem lést frá Þýskalandi.

Í frétt breska ríkisútvarpsins segir að maðurinn hafi fallið af miðhæð stúkunnar á hæðina þar fyrir neðan og þaðan á stiga við fjölmiðlasvæði vallarins.

Í yfirlýsingu Knattspyrnusambands Evrópu, UEFA, segir að læknateymi vallarins hafi gert hvað það gat en maðurinn hafi því miður verið úrskurðaður látinn stuttu eftir miðnætti.

„Hugur okkar er hjá ástvinum hans á þessum erfiða tíma,“ segir einnig í yfirlýsingunni.