Völdu þann leik­mann í Bestu deildinni sem er líkastur þeim sjálfum

Í uppbótatíma Stúkunnar fá sérfræðingar þáttarins á sig spurningar úr ýmsum áttum en sérfræðingar Stúkunnar að þessu sinni voru þeir Lárus Orri Sigurðsson og Ólafur Kristjánsson.

Guðmundur Benediktsson spurði sérfræðingana fyrst af því hvort hæfni dómara í Bestu deildinni í dag væri eitthvað minna en hæfni leikmannanna sjálfra. Því næst svöruðu þeir hver væri besti markmaðurinn í deildinni í dag.

Þá var komið að mjög sérstakri spurningu.

„Þriðja og síðasta spurningin í uppbótatímanum. Þessi er svolítið áhugaverð,“ sagði Guðmundur brosandi.

„Hvaða leikmaður í deildinni líkist ykkur mest þegar þið voruð á hátindi ferilsins,“ spurði Guðmundur.

„Hver er svona vel spilandi hafsent í deildinni?, sagði Lárus Orri og Gummi Ben skellti upp úr.

„Hlærðu að því, sagði Lárus.

„Nei, nei, ég vara að hlæja að því að þú myndir ekki nafnið á honum,“ svaraði Guðmundur.

„Þessi er svakaleg. Það er svo langt síðan að maður spilaði, sagði Ólafur en hann spilaði síðast í deildinni árið 1997.

Hér fyrir neðan má horfa á sérfræðingana velja sinn mann sem og að svara spurningunum tveimur á undan.